პოლონეთის სეიმმა მიიღო დადგენილება, რომლითაც II მსოფლიო ომის დაწყებაში ნაცისტურ გერმანიასთან ერთად სსრკ-ც არის დადანაშაულებული

საქართველო, თბილისი - 15:38 | 10.01.2020

ნანახია: 1127

პოლონეთის სეიმმა მიიღო დადგენილება, სადაც მეორე მსოფლიო ომის დაწყებაში, ნაცისტურ გერმანიასთან ერთად საბჭოთა კავშირიც არის დადანაშაულებული. შესაბამისი დოკუმენტი პოლონეთის საკანონმდებლო ორგანოს ვებგვერდზეა განთავსებული.

"პოლონეთის რესპუბლიკის სეიმს გმობს რუსეთის ფედერაციის უმაღლესი ხელისუფლების წარმომადგენლების პროვოკაციულ და მცდარი შინაარსის განცხადებებს, რომლებიც ცდილობენ პოლონეთი დაადანაშაულონ მეორე მსოფლიო ომის დაწყებაში

სახელმწიფოებს შორის ურთიერთობათა განვითარება შეუძლებელია სიცრუესა და ისტორიის ფალსიფიცირებაზე დაყრდნობით", - ნათქვამია ხუთშაბათს მიღებულ დადგენილებაში.

დოკუმენტში ნათქვამია, რომ მეორე მსოფლიო ომის დაწყება გამოწვეული იყო იმდროინდელი ორი ტოტალიტარული ძალაუფლებით: ნაცისტური გერმანიისა და სტალინური საბჭოთა კავშირით.

ხოლო სამარცხვინო რიბენტროპ-მოლოტოვის პაქტის დადების შემდეგ, 1939 წლის 23 აგვისტოს, ტოტალიტარული რეჟიმების პირველი მსხვერპლი გახდნენ პოლონეთი და ცენტრალური და აღმოსავლეთ ევროპის ქვეყნები.

"ომმა გამოიწვია ათობით მილიონი ადამიანის სიცოცხლის მოსპობა, ნაცისტური საკონცენტრაციო ბანაკების შექმნა და ჰოლოკოსტი - ერთ-ერთი უდიდესი დანაშაული კაცობრიობის ისტორიაში", - ნათქვამია დადგენილებაში.