ჩვენი მიზანია ფილმის ჩვენების ჩაშლა კომბლებისა და ჯოხების გარეშე - გურამ ფალავანდიშვილი

ჩვენი მიზანია ფილმის ჩვენების ჩაშლა, კომბლებისა და ჯოხების  გარეშე, – აცხადებს "მართლმადიდებელ მშობელთა კავშირის" წევრი, გურამ ფალავანდიშვილი ფილმის „და ჩვენ ვიცეკვეთ“ პრემიერის შესახებ.

მისი თქმით, თუ ამ სამი დღის განმავლობაში ფილმის ჩვენება მაინც გაიმართება, პასუხისმგებლობა მთავრობამ უნდა აიღოს.

„ვაპირებ, არაძალადობრივად გამოვრთო ფილმი და მოვაწყო პიკეტირება. თუ არ შეგვიშვეს, აწეული ხელებით მაინც შევალთ. მქონდა იდეა, დავმჯდარიყავი კინოთეატრში. თუ შსს-ის უნდა და იცავს ეკლესიის, ერის, ყველაფრის მიუხედავად ამ ფილმის გაშვებას, ხელებაწეულები შევეცდებით, ამას შევეწინააღმდეგოთ. ამ ფილმის გაშვება არის საშინელება. თუ ამ სამი დღის განმავლობაში მაინც გაიმართება ფილმის ჩვენება, პასუხი მთავრობას უნდა მოვთხოვოთ“, - განაცხადა ფალავანდიშვილმა, რომელიც ჰომოფობიური გამოსვლებით არის ცნობილი.

მისივე თქმით, იმ შემთხვევაში, თუ ფილმის პრემიერა მაინც გაიმართება, პროტესტი რუსთაველზე  გადაინაცვლებს.

ქართული წარმოშობის შვედი რეჟისორის ლევან აკინის ფილმის „და ჩვენ ვიცეკვეთ“ (And Then We Danced) პრემიერა საქართველოში დღეს, 8 ნოემბერს გაიმართება.

ფილმის დაგეგმილი ჩვენება გააპროტესტა ბიზნესმენმა ლევან ვასაძემაც, რომელიც  ასევე ჰომოფობიური განცხადებებით გამოირჩევა. ის  ფილმის - ა მხარდამჭერებთან ერთად პრემიერის ჩაშლას გეგმავს.