თურქეთმა ალ-ბაღდადის დის დაკავების ფაქტი დაადასტურა

ანკარამ „ისლამური სახელმწიფოს“ ლიდერის აბუ ბაქრ ალ-ბაღდადის დის რასმია ავადის დაკავების ფაქტი დაადასტურა. ამის შესახებ თურქეთის პრეზიდენტის ადმინისტრაციის წარმომადგენელმა ფაჰრეთინ ალთუნმა განაცხადა.

მანამდე სააგენტოებმა „ასოშიეიტედ პრესმა“ და „როიტერმა“ თურქ, მაღალი თანამდებობის პირზე დაყრდნობით გაავრცელეს ინოფრმაცია, რომ თურქეთის ხელისუფლებამ ალ-ბაღდდის უფროსი და ოჯახთან ერთად დააკავა. სააგენტოების ცნობით, 65 წლის რასმია ავადი სირიაში, ალეპოს პროვინციის ქალაქ აზაზში დააკავეს. სააგენტოებისვე ცნობით, ავადი ეჭვმიტანილია ტერორისტულ ორგანიზაციასთან კავშირში.

 „ალ-ბაღდადის დის დაკავება ჩვენი ანტიტერორისტული ოპერაციების კიდევ ერთი წარმატების მაგალითია“, - დაწერა ალთუნმა მიკრობლოგ Twitter-ზე.

ალ-ბაღდადი 27 ოქტომბერს, სირიაში,  აშშ-ის სამხედრო ოპერაციის შედეგად ლიკვიდირდა. მან თვითმკვლელის ქამარი აამოქმედა. მასთან ერთად დაიღუპა მისი ორი შვილიც. ამერიკელმა სამხედროებმა ასევე მოკლეს ალ-ბაღდადის თანმხლები ხუთი ადამიანი, მათ შორის ოთხი ქალი.