ერაყში ირანის საკონსულოზე თავდასხმის მცდელობის შედეგად 5 ადამიანი დაიღუპა

საქართველო, თბილისი - 15:03 | 04.11.2019

ნანახია: 826

ხუთი ადამიანი დაიღუპა ერაყის ქალაქ ქერბელაში დემონსტრანტების მხრიდან ირანის საკონსულოს შენობაზე შტურმის მცდელობის შედეგად. იუწყება Shafaq-ი.

"ხუთი ადამიანი დაიღუპა დემონსტრანტების დაშლისა და ქერბელაში ირანის საკონსულოს შენობაზე იერიშის მცდელობის შედეგად, დაჭრილია რამდენიმე ადამიანი.", - იუწყება სააგენტო წყაროზე დაყრდნობით.

ერაყის უმეტეს ქალაქში, სადაც შიიტი მოსახლეობა ცხოვრობს, ორშაბათს საყოველთაო გაფიცვა გამოცხადდა. გადაკეტილია მთავარი ავტომაგისტრალები.

ერაყში საპროტესტო გამოსვლები ოქტომბერში დაიწყო. დემონსტრანტები მოითხოვენ ხელისუფლების გადადგომას, კორუფციასთან ბრძოლის გამკაცრებას, უმუშევრობის შემცირებასა და ცხოვრების პირობების გაუმჯობესებას. ერაყის პრემიერ-მინისტრმა განაცხადა, რომ იგეგმება მინისტრთა კაბინეტში გადაადგილებები და საარჩევნო კანონში ცვლილებების შეტანა. ამასთან, მან აღნიშნა, რომ მთავრობის სრული შემადგენლობით გადადგომა ქვეყანას ქაოსამდე მიიყვანს.