ის, რომ რუსეთის დელეგაციის წევრებს აშშ-ის ვიზა არ მისცეს, მკაცრ რეაგირებას საჭიროებს - პესკოვი

რუსეთის პრეზიდენტის პრეს-მდივნის დიმიტრი პესკოვის განცხადებით, იმის გამო, რომ გაეროში რუსეთის დელეგაციის წევრებს აშშ-ის ვიზები არ მისცეს, დიპლომატიური ხაზით დაწყებულია სამუშაოები და ზომების მიღება იგეგმება.

„იცით, რომ ამჟამად, ჩვენი დიპლომატები მუშაობენ, ამერიკის ელჩი მიწვეულია საგარეო საქმეთა სამინისტროში და ვაშინგტონშიც ჩვენი საელჩო ზომებს იღებს. დიპლომატიური ხაზით მუშაობა მიმდინარეობს“, - განაცხადა პესკოვმა ჟურნალისტების შეკითხვაზე თუ რა ზომები გატარდება აღნიშნულ სიტუაციასთან დაკავშირებით.

მისი თქმით, სიტუაცია საგანგაშოა და აშშ-ის მხრიდან მსაგვსი ქმედება მიუღებელია, რადგან თავად ვაშინგტონი არღვევს თავის საერთაშორისო ვალდებულებს.

„ეს ვაშინგტონის საერთაშორისო ვალდებულებების პირდაპირი დარღვევაა. საუბარია არა ორმხრივ, არამედ გაეროს გენერალურ ასამბლეაზე რუსეთის დელეგაციის ვიზიტზე. ამერიკა გაეროს შტაბ-ბინას თავის ტერიტორიას აძლევს და ფაქტობრივად ერთადერთი, რისი გაკეთების უფლებაც აქვს, ეს არის მაგალითად, რუსეთის დელეგაციის წვერებს შეუზღუდოს ერთ ქალაქში - ნიუ-იორკში ყოფნა. სხვა რაიმე რესტრიქციების შემოღების უფლება აშშ-ის არ აქვს მათთვის, ვინც გენერალურ ასამბლეაზე მიემგზავრება. დღეს ეს წესები დაირღვა. რაც, რა თქმა უნდა, მოითხოვს საკმაოდ მკაცრ რეაგირებას მოსკოვის მხრიდან, ასევე ჩვენი აზრით, გაეროს მხრიდანაც, რადგან სიტუაცია უშუალოდ ეხება გაერთიანებული ერების ორგანიზაციას და მის შტაბ-ბინას“, - აღნიშნა პესკოვმა.

24-30 სექტემბერს ნიუ-იორკში გაეროს გენერალური ასამბლეის 74-ე სესია იმართება. აშშ-მა რუსეთის ოფიციალური დელეგაციის წევრებს ვიზები არ მისცა, რის გამოც მათ ნიუ-იორკში ჩასვლა ვერ შეძლეს.