ბიბილოვი საქართველოს ხელისუფლებასთან ურთიერთობების ნორმალიზაციის პირობად „ოსი ხალხის გენოციდის“ აღიარებას ასახელებს

ცხინვალის საოკუპაციო რეჟიმი საქართველოს ხელისუფლებასთან ურთიერთობის ნორმალიზაციის პირობად მის მიერ ოსი ხალხის „გენოციდისა“ და სამხრეთ ოსეთის „დამოუკიდებლობის აღიარებას“ მიიჩნევს. ამის შესახებ დე-ფაქტო პრეზიდენტმა ანატოლი ბიბილოვმა განაცხადა.

 „დღეს ჩვენ არანაირი ურთიერთობა არ გვაქვს, რადგან სახელმწიფოსთან, რომელიც ფაქტობრივად დაკავებული იყო ოსი ხალხის გენოციდით, არანაირი ურთეირთობა არ შეიძლება არსებობდეს ამ გენოციდის აღიარების გარეშე. ძალის გამოუყენებლობის შესახებ მემორანდუმის გაფორმებისა და სამხრეთ ოსეთის დამოუკიდებლობის აღიარების გარეშე“, - განაცხადა ოსი სეპარატისტებს ლიდერმა.

მისი თქმით, საქართველოს ხელისუფლებაში ვერ ხედავს პოლიტიკოსებს, რომლებიც პასუხიმგებლობას აიღებდნენ.

 „დღეს საქართველო ამერიკის მმართველობის ქვეშ არის. ეს ფაქტია. ისინი ამას თვითონ ამბობენ, თვითონ აღიარებენ. ვიდრე საქართველოს ხელისუფლებაზე არსებობს პოლიტიკური ჰეგემონიის ფაქტორი ამერიკის მხრიდან, არ იარსებებენ კონკრეტული პოლიტიკოსები, რომლებიც დაინტერესებულნი იქნებოდნენ იმაში, რომ სამხრეთ კავკასიაში დამყარდეს მშვიდობა, რომ სამხრეთ კავკასიაში არ იყოს დენთის კასრი, რომელიც ნებისმიერ დროს აფეთქდება. ვიდრე ასეთი ადამიანები არ გამოჩნდებიან, ჩვენ არანაირი ურთიერთობა არ გვექნება“, - განაცხადა ე.წ. პრეზიდენტმა.

ოსი სეპარატისტი ამბობს, რომ საქართველოსთან ურთიერთობის ერთადერთი საშუალება ჟენევის მოლაკარაკებების ფორმატია.

 „რატომ არ აწერენ ხელს ძალის გამოუყენებლობის მემორანდუმს? და ეს ხელის არმოწერა რა კავშირშია ნატოს სწავლებასთან სამხრეთ კავკასიაში? რა ინტერესი აქვთ ამერიკელებს სწავლების გამართვასთან? ეს გარკვეულ დაძაბულობას ქმნის“, - განაცხადა ე.წ. პრეზიდენტმა.