ნოტრ-დამი, შესაძლოა, 3D-პრინტერის დახმარებით აღადგინონ

პარიზის ღვთისმშობლის ტაძარი, შესაძლოა, 3D-პრინტერის დახმარებით აღდგეს. ამის შესახებ Le Figaro ჰოლანდიურ კომპანია Concr3De-ზე დაყრდნობით იუწყება.

როგორც აღნიშნულია, ასეთი ტექნოლოგიით ტაძარი სწრაფად აღდგება, ასევე მომგებიანი იქნება ფინანსური კუთხითაც.

ჰოლანდიელების თქმით, გორგულიის ქანდაკების აღდგენა 24 საათის განმავლობაშია შესაძლებელი და მასზე 2500- 5000 ევრო დაიხარჯება, რაც გაცილებით იაფი დაჯდება, ვიდრე მისი ქვიდან გამოჭრა.

ჰოლანდიური კომპანია ასევე გამოიყენებს ნაცრის ნარევს, კირქვას, მელანს და არაორგანულ ნაერთებს ტაძრის დეტალების შესაერთებლად.

15 აპრილს ნოტრდ-დამში გაჩენილი ხანძრის შედეგად ჩამოინგრა სახურავის ორი-მესამედი, მთლიანად განადგურდა გოთიკური შპილი.

გადარჩა ყველა შედევრი და რელიქვია. ასევე, უვნებელია გარე ფასადი, კარიბჭე და ტაძარში დაცული უნიკალური ქანდაკებები.

 წინასწარი ვერსიით, აალება სარემონტო სამუშაობის დროს გაუფრთხილებლობამ გამოიწვია.