ტექნიკური უნივერსიტეტის სტუდენტთა კონფერენციის გამარჯვებულები ენერგოკომპანიებმა დააჯილდოვეს

საქართველოს ტექნიკურ უნივერსიტეტში ენერგეტიკისა და ტელეკომუნიკაციის ფაკულტეტის სტუდენტთა რიგით მეორე ღია სამეცნიერო კონფერენციის - ,,ენერგეტიკა და გარემო" - გამარჯვებულები უკვე გამოვლენილია.

ენერგეტიკის დარგის წამყვანი სპეციალისტებით დაკომპლექტებულმა სპეციალურმა კომისიამ ტექნიკური უნივერსიტეტის ენერგეტიკის საგანმანათლებლო პროგრამის ბაკალავრიატის, მაგისტრატურისა და დოქტორანტურის 7 გამარჯვებულ სტუდენტსა და სამეცნიერო კონფერენციის 12 გამორჩეულ მონაწილეზე მსხვილი ენერგოკომპანიების მიერ დაწესებული ფულადი პრიზები გაანაწილა. კომისიამ სამეცნიერო კონფერენციის მონაწილე ყველა სტუდენტს სერტიფიკატები გადასცა.

სპეციალური კომისიის გადაწყვეტილებით, პირველი ადგილი მიენიჭა ბაკალავრიატის მესამე კურსის სტუდენტს - თენგიზ აკობიას, რომლის მოხსენებაც საუკეთესოდ იქნა აღიარებული. პირველი ადგილის მფლობელ სტუდენტს კომპანია „ბლაუენშტაინ საქართველოსგან" 500 ლარის ოდენობით ფულადი პრემია გადაეცა და კომპანიაში ანაზღაურებად სტაჟირებაზე იქნა მიწვეული.

მეორე და მესამე ადგილები კი ბაკალავრიატის მე-3 კურსის სტუდენტებმა - ფიქრია ელიზარაშვილმა და ბექა შონიამ დაიკავეს. ორივე გამარჯვებულს კომპანია „საქრუსენერგოს" წარმომადგენელმა 500-ლარიანი სასაჩუქრე ვაუჩერი გადასცა. „ენერგოეფექტურობის ცენტრის" რჩეულები გახდნენ ბაკლავრიატის მე-2 კურსის სტუდენტები ბექა ილურიძე და გიორგი ღაჭავა, რომლებიც 200-200 ლარით დაჯილდოვდენ.

დოქტორანტებს შორის გამარჯვებული გახდა მე-2 კურსის სტუდენტი - თამარ კანაშვილი, ხოლო მაგისტრანტებს შორის - პირველკურსელი ანი ჯანუყაშვილი. მათ „საქრუსენერგოს" მიერ დაწესებული 500-ლარიანი სასაჩუქრე ვაუჩერები გადაეცათ.

საქართველოს სახელმწიფო ელექტროსისტემის წარმომადგენელმა კონფერენციის მონაწილე 12 გამორჩეული სტუდენტი 125-ლარიანი სასაჩუქრე ვაუჩერით დააჯილდოვა. კომპანია „თელასის" წარმომადგენელმა კი 10 რჩეული სტუდენტი ანაზღაურებად სტაჟირებაზე მიიწვია, მათგან სამი ყველაზე მეტად წარმატებულის კომპანიაში დასაქმების პერსპექტივით.

საქართველოს ტექნიკური უნივერსიტეტის ენერგეტიკისა და ტელეკომუნიკაციის ფაკულტეტის სტუდენტურ სამეცნიერო კონფერენციაზე, საერთო ჯამში, 21 მომხსენებელი წარსდგა, რომელთაგან 15 ბაკალავრიატის, ხოლო 6 - მაგისტრატურისა და დოქტორანტურის სტუდენტია. მათი ნაშრომები და კვლევები საქართველოს ენერგეტიკის დარგში მიმდინარე პრობლემებსა და მათი გადაჭრის გზებს, ინოვაციებს, მწვანე ენერგიის განვითარების შესაძლებლობებს, დარგში მიმდინარე დადებით თუ უარყოფით პროცესებს, ალტერნატიული ენერგიის მიღების წყაროებს, ენერგეტიკული დარგის განვითარების მიმართულებებს ეხებოდა და მსოფლიოში მიმდინარე პროცესების გაანალიზების მცდელობასაც ისახავდა მიზნად.

საქართველოს ტექნიკურ უნივერსიტეტთან ერთად, სტუდენტთა რიგით მეორე ღია სამეცნიერო კონფერენციის - ,,ენერგეტიკა და გარემო" - ორგანიზატორები იყვნენ საქართველოს ეკონომიკისა და მდგრადი განვითარების სამინისტრო, საქართველოს ენერგეტიკის აკადემია, საქართველოს სახელმწიფო ელექტროსისტემა, „თელასი", „საქრუსენერგო", ენერგოეფექტურობის ცენტრი, საკონსულტაციო-საპროექტო კომპანია „გროს ენერჯი ჯგუფი" (GEG) და „ბლაუენშტაინ საქართველო" (Blauenstein Georgia).