პატრიარქს პატიმრების შეწყალების უფლება უნდა ჰქონდეს - ეკა ბესელია

პარლამენტის ადამინის უფლებათა დაცვის კომიტეტის თავმჯდომარე, ეკა ბესელია, პატრიარქის ინიციატივას მიესალმება და ამბობს, "თუ პოლიტიკური ნება იქნება, იდეას ბევრი მხარდამჭერი ეყოლება".

თავად კი ფიქრობს, რომ პატრიარქს პატიმრების შეწყალების უფლება უნდა ჰქონდეს. 

"საქართველოს პატრიარქსაც ჰქონდეს ეს განსაკუთრებული უფლება, როგორც ადამიანს, რომელსაც საქართველოს მოსახლეობის ყველაზე დიდი ნდობა აქვს," - განაცხადა ბესელიამ.

დღეს საქართველოს პატრიარქმა პრემიერ-მინისტრს თხოვნით მიმართა, რომ მას პატიმრების შეწყალების უფლება მიანიჭოს.

ირაკლი ღარიბაშვილს ამ საკითხზე ჯერჯერობით კომენტარი არ გაუკეთებია. თუმცა, მმართველი გუნდიდან უკვე კეთდება განცხადებები, რომ ისინი ამ ინიციატივას მიესალმებიან. 

საქართველოს კონსტიტუციის 73-ე მუხლის მიხედვით, მსჯავრდებულთა შეწყალების უფლება მხოლოდ საქართველოს პრეზიდენტს აქვს. ეს კი იმას ნიშნავს, რომ ილია მეორეს ინიციატივის დასაკმაყოფილებლად საკონსტიტუციო ცვლილებებია საჭირო.