მაია მიმინოშვილი, თამარ სანიკიძე, ლია გიგაური და თემურ მურღულია თანამდებობიდან გათავისუფლდნენ

საქართველო, თბილისი - 17:45 | 10.09.2018

ნანახია: 1101

განათლების ხარისხის განვითარების ეროვნული ცენტრის დირექტორი თამარ სანიკიძე, გამოცდების ეროვნული ცენტრის ხელმძღვანელი მაია მიმინოშვილი, პროფესიული განვითარების ეროვნული ცენტრის ხელმძღვანელი გიორგი მაჩაბელი და საქართველოს განათლების, მეცნიერების, კულტურისა და სპორტის მინისტრის მოადგილე ლია გიგაური და თემურ მურღულია, ასევე ეროვნული სამეცნიერო ფონდის გენდირექტორი მანანა მიქაბერიძე მინისტრმა, მიხეილ ბატიაშვილმა თანამდებობიდან გაათავისუფლა.

„მივიღეთ გადაწყვეტილება და თანამდებობას ტოვებენ მინისტრის მოადგილეები თემურ მურღულია, ლია გიგაური, ასევე თამარ სანიკიძე, გიორგი მაჩაბელი, მანანა მიქაბერიძე, მაია მიმინოშვილი”, – განაცხადა მინისტრმა.

როგორც მინისტრმა ბრიფინგზე განაცხადა, სისტემაში საკადრო ცვლილებები გაგრძელდება.

მაია მიმინოშვილი 2002-2007წწ. სათავეში ედგა გამოცდების ეროვნულ ცენტრს, ხოლო 2007 წელს დაინიშნა განათლებისა და მეცნიერების მინისტრად. 2008 წლიდან კვლავ გამოცდების ეროვნულ ცენტრს ხელმძღვანელობდა.

თამარ სანიკიძე 2012 წლის ოქტომბერში დაინიშნა საქართველოს განათლებისა და მეცნიერების მინისტრის, გიორგი მარგველაშვილის მოადგილედ. 2013 წლის ივლისში, როდესაც გიორგი მარგველაშვილმა საპრეზიდენტო არჩევნებში მონაწილეობის მისაღებად დატოვა მინისტრის პოსტი, დაინიშნა განათლებისა და მეცნიერების მინისტრად. ეს პოსტი მას 2016 წლის 3 ივნისამდე ეკავა, როდესაც პრემიერ-მინისტრმა გიორგი კვირიკაშვილმა ის ალექსანდრე ჯეჯელავათი შეცვალა. ამის შემდეგ ის განათლების ხარისხის განვითარების ეროვნული ცენტრის დირექტორის პოზიციას იკავებდა.

ლია გიგაური 2013 წლიდან დღემდე საქართველოს განათლების, მეცნიერების, კულტურისა და სპორტის მინისტრის მოადგილე იყო. ასევე, მინისტრის მოადგილე იყო თემურ მურღულია.

ეროვნული სამეცნიერო ფონდის გენდირექტორის პოსტს იკავებდა მანანა მიქაბერიძე და პროფესიული განვითარების ეროვნული ცენტრის ხელმძღვანელი იყო გიორგი მაჩაბელი, რომელიც ასევე გათავისუფლდა თანამდებობიდან.