გიორგი კვერენჩხილაძე: სააკაშვილისთვის მოქალაქეობის შეწყვეტა კანონით დადგენილ ვადებში მოხდება

პრეზიდენტის საპარლამენტო მდივანი გიორგი კვერენჩხილაძე აცხადებს, რომ საქართველოს პრეზიდენტი მიხეილ სააკაშვილისთვის მოქალაქეობის შეწყვეტის თაობაზე გადაწყვეტილებას კანონით დადგენილ ვადებში - უახლოეს დღეებში მიიღებს.

მისი განმარტებით, პრეზიდენტის ადმინისტრაციაში ყოველთვიურად შედის არაერთი დასკვნა მოქალაქეობის შეწყვეტასთან დაკავშირებით, მიხეილ სააკაშვილთან დაკავშირებით დასკვნა კი დღეს შევიდა.

მოქალაქეობის საკითხის განხილვისთვის წარმოების ვადა არის სამთვიანი, თუმცა მასში შედის ასევე იუსტიციის სამინისტროში დაწყებული წარმოება. პრეზიდენტის ადმინისტრაციაში დამკვიდრებული ტრაქტიკის თანახმად, უახლოეს დღეებში იქნება გადაწყვეტილება მიღებული მიხეილ სააკაშვილისთვის მოქალაქეობის შეწყვეტის თაობაზე", - განაცხადა გიორგი კვერენჩხილაძემ. 
როგორც მან განმარტა, დაუშვებელია საქართველოს მოქალაქე იმავდროულად იყოს უცხო ქვეყნის მოქალაქე. მისივე თქმით, საქართველოს მოქალაქის მიერ უცხო ქვეყნის მოქალაქეობის მიღება არის მისთვის მოქალაქეობის შეწყვეტის უპირობო საფუძველი. 
"მერე ვინ რას იზამს, როგორ გადაწყვეტილებას მიიღებს, ეს უკვე მათი გადასაწყვეტია. კონსტიტუციით და მოქმედი კანონმდებლობით, ზოგადად ყველას, ნებისმიერ მოქალაქეს აქვს უფლება მიმართოს პრეზიდენტს ორმაგ მოქალაქეობაზე", - დასძინა კვერენჩხილაძემ.