პროკურატურა სამართლიანი, თავდაჯერებული და ღია ინსტიტუტი რომ გახდეს, ნებისმიერ გადაწყვეტილებას შეგვიძლია ველოდოთ - შალვა თადუმაძე

მთავარი პროკურატურა სამართლიანი, თავდაჯერებული და ღია ინსტიტუტი რომ გახდეს, ნებისმიერ გადაწყვეტილებას შეგვიძლია ველოდოთ, – ამის შესახებ ჟურნალისტებს მთავარმა პროკურორმა, შალვა თადუმაძემ განუცხადა.

როგორც ის განმარტავს, პროკურორების ის რაოდენობა, რომელიც მთავარ ძალოვან უწყებაში მუშაობს, საკმარისია.

"რამდენიმე პრინციპული საკითხია გადასაჭრელი. პირველ რიგში, ეს არის სამართლიანი პროკურატურის ჩამოყალიბება, შემდეგ თავდაჯერებული პროკურორის შექმნა, როგორც ინსტიტუტის შექმნა და ღია სახელმწიფო უწყების არსებობა, რის შესაძლებლობასაც კანონმდებლობა გვაძლევს. კანონის თანახმად, არანაირი ვალდებულება არ არის მოადგილეების უფლებამოსილების შეწყვეტის თაობაზე და ვაპირებ, მუშაობა იმ რეჟიმში გავაგრძელო, რა რეჟიმშიც საქართველოს პროკურატურა მუშაობდა და ასევე იმ წესებით ვიმუშაო, რაც წესებიც არსებობს. სხვა შემთხვევაში სხვა გადაწყვეტილებებს მივიღებთ, რომლიც დაკავშირებული იქნება მენეჯმენტის გაძლიერებისა და იმ მიზნის მიღწევისკენ, რომელიც დავასახელე. დღეს, საქართველოს პროკურატურა 442 პროკურორით მუშაობს. ვფიქრობ, ეს საკმარისი რაოდენობაა “, – განაცხადა თადუმაძემ.