კუბას თავს შტორმი „ალბერტო“ დაატყდა

5 ათასზე მეტი ადამიანის ევაკუაცია გახდა საჭირო კუბაში სუბტროპიკული შტორმის „ალბერტოს“ გამო.

მეტეოროლოგების პროგნოზით, გადაუღებელი წვიმა კუნძულზე კიდევ უახლოესი 24 საათის განმავლობაში გაგრძელდება.

კუბის ცენტრალური ნაწილიდან 3 ათასი მცხოვრები დატბორვის საშიშროების გამო უსაფრთხო ადგილზე გადაიყვანეს.

კიდევ 2 ათასი ადამიანის ევაკუაცია მოხდა სანტა-კლარას პროვინციაში.

ექსპერტების ცნობით, 48 საათის განმავლობაში კუნძულზე 74 მილიმეტრი ნალექი მოვიდა, რაც მაისის ნორმის 54 პროცენტია.

 „ალბერტო“ პირველი სუბტროპიკული შტორმი გახდა 2018 წელს, რომელსაც სახელი დაარქვეს. შტორმს სახელს იმ შემთხვევაში ანიჭებენ, როდესაც ქარის სიჩქარე საათში 62 კმ-ს აღწევს. საათში 119 კმ-ის მიღწევისას კი ის ქარიშხალი ხდება.

 „ალბერტოს“ მიახლოების გამო ამერიკის ალაბამას, ფლორიდისა და მისისიპის შტატებმა საგანგებო მდგომარეობა გამოაცხადეს.