აჭარის საინვესტიციო პორთფელში თანხობრივად ტურიზმის სექტორში განხორციელებული ინვესტიციები ენერგეტიკის სექტორს სჭარბობს

აჭარის საინვესტიციო პორთფელში თანხობრივად ტურიზმის სექტორში განხორციელებული ინვესტიციები ენერგეტიკის სექტორს სჭარბობს. აღნიშნულს აჭარის ფინანსთა და ეკონომიკის სამინისტროს ეკონომიკური განვითარების დეპარტამენტის უფროსი ეკატერინე ბახტაძე  რეგიონში ჰესების მშენებლობით ხსნის.

„2015 წლის 9 თვის მონაცემებით ტურიზმის სექტორის ინვესტიციების მთლიან ინვესტიციებში პროცენტული ცვლილება გამოწვეულია აჭარის რეგიონში ენერგეტიკის სექტორში ინვესტიციების აქტიურ განხორიელებასთან. როგორც მოგეხსენებათ აჭარის რეგიონში ხორციელდება მცირე და საშუალო ზომის ჰესების მშენებლობა, რომელიც მიმდინარე წელს შესულია აქტიურ ფაზაში. გამომდინარე აქედან ინვესტიციების უმეტესი წილი მოდის ენერგეტიკის სექტორზე, რამაც შეამცირა ტურიზმის სექტორის წილი მთლიან ინვესტციებში პროცენტულად, თუმცა თანხობრივად ინვესტიციების მოცულობა ტურიზმის სექტორში არ შემცირებულა, პირიქით ადგილი აქვს მის ზრდას“, განმარტავს ეკატერინე ბახტაძე.

 ეკონომიკური განვითარების დეპარტამენტის უფროსი დარწმუნებულია, რომ 2016 წელს და შემდგომ წლებში ტურიზმის სექტორში განხორციელებული ინვესტიციების წილი მთლიან ინვესტიციებში გაიზრდება, რადგან რეგიონში დაგეგმილია და ხორციელედება მნიშივნელოვანი ტურისტული ობიექტების მშენებლობა, ხოლო ინვესტიციების მთავარი დარგი ენერგეტიკის სექტორში დაიწყებს კლებას, ვინაიდან შემდგომ წლებში დაგეგმილია ჰესების მშენებლობის დასრულება.

„2015 წელს პრივატიზაციის შედეგად ტურიზმის სექტორს შეემატება მნიშვნელოვანი ობიექტები, რომელთა მშენებლობა მსხვილ ინვესტიციებს უკავშირდება:

• შპს,, ალიანსის"   მიერ 100 ნომრიანი სასტუმორს მშენებლობა, აღნიშნულ პროექტში არანაკლებ 30 000 000 ლარის ინვესტიციის განხორციელება იგეგმება;
• სს „მეტრო ატლას ჯორჯიას“ მიერ არანაკლებ 200 ნომრიანი სასტუმროსა და სამორინეს მშენებლობა, ახალი პროექტის მიხედვით განხორციელდება 20 000 000 აშშ დოლარის ინვესტიცია;
• შპს „ეიერ-მერიდიანსის“ მიერ არანაკლებ 220 ნომრიანი სასტუმროს, არანაკლებ 600 აპარტამენტის, სამორინეს, საკონფერენციო დარბაზის, სპორტულ-გამაჯანსაღებელი ცენტრის, სხვადასხვა ტიპის კვების ობიექტების მშენებლობა, არანაკლებ 13 000 კვ.მ-ზე მიწის ნაკვეთზე სარეკრიაციო ზონის და ავტოსადგომის მოწყობა. აღნიშნულ პროექტში არანაკლებ 30 000 000 აშშ დოლარის ინვესტიციის განხორციელება იგეგმება;
• შპს „DAR BUILDING“ მიერ მრავალფუნქციური შენობა-ნაგებობის (სასტუმრო - არანაკლებ 80 (ოთხმოცი) ნომერი, საცხოვრებელი აპარტამენტების მშენებლობა, ჯამში ორი პროექტის განხორციელება მოხდება. სულ განსახორციელებელი ინვესტიციის მოცულობა 22 000 000 აშშ. დოლარია;
• შპს ,,სახლი ხეივანში"-ის მიერ არანაკლებ 80 ნომრიანი სასტუმროს, საზოგადოებრივი კვების ობიექტის და გასართობი ცენტრის მშენებლობა აღნიშნულ პროექტში კომპანიამ უნდა უზრუნველყოს არანაკლებ 9 000 000 აშშ. დოლარის ინვესტიციის განხორციელება;

• სს,,ია-ფეთ იალჩინ პეტროლ თურიზმ თიჯარეთის წარმომადგენლობა საქართველოში" მიერ აშენდება 100 ნომრიანი სასტუმრო, აპარტამენტები, კაზინო, კომერციული ფართები, პარკინგი და სარეკრიაციო ზონა (სკვერი, პარკი)). აღნიშნულ პროექტში მოხდება არანაკლებ 9 000 000 აშშ დოლარის ინვესტიციის განხორციელება.
• შპს „ბიზნეს დეველოპმენტის“ მიერ არანაკლებ 150 ნომრიანი სასტუმროს, ავტოსადგომის, ღია და დახურული აუზების, კვების ობიექტების, გამაჯანსაღებელი ცენტრის მშენებლობა. აღნიშნულ პროექტში მოხდება არანაკლებ 30 000 000 ლარის ინვესტიციის განხორციელება.

 ზემოაღნიშნული მსხვილი პროექტების გარდა არის სხვა ტურისტული პროექტებიც, რომლებიც ასევე უზრუნველყოფენ სამომავლოდ ინვესტიციების ზრდას ტურიზმის სექტორში“, აცხადებს ეკატერინე ბახტაძე.

 მისივე განმარტებით, ბოლო 4 წლის მონაცემებით აჭარის ავტონომიური რესპუბლიკის ტერიტორიაზე კერძო სექტორის მიერ განხორციელებულ ინვესტიციებში მნიშვნელოვანი წილი უჭირავს ტურიზმის სექტორს, რომელზეც მოდის განხორციელებული ინვესტიციების 35-45 %. 2015 წლის 9 თვის მონაცემებით ამ დარგში განხორციელებულ იქნა 90,5 მლნ. აშშ დოლარი, რაც 10%-ით აღემატება 2014 წლის შესაბამის მაჩვენებელს, 58,3 %-ით 2013 წლის, ხოლო 93 % -ით 2012 წლის 9 თვის განმავლობაში ტურიზმის სექტორში განხორციელებულ ინვესტიციებს.

რაც შეეხება ტურიზმის დარგში გახორციელებული ინვესტიციების წილს მთლიან ინვესტიციებში იგი შემდეგნარად გამოიყურება:

2012 წლის 9 თვე - 41 %; - 46,9 მლნ. აშშ დოლარი

2013 წლის 9 თვე - 40 %; - 58,3 მლნ. აშშ დოლარი

2014 წლის 9 თვე - 45 %; - 82,5 მლნ. აშშ დოლარი

2015 წლის 9 თვე - 35 %. – 90,5 მლნ. აშშ დოლარი

შეგახსენებთ, რომ აჭარაში კერძო პირდაპირი ინვესტიციების მოცულობა 42%-ითა გაზრდილი. 2015 წლის 9 თვეში რეგიონში ინვესტიციების მოცულობამ 259,9 მლნ ლარი შეადგინა, რაც გასული წლის ანალოგიურ პერიოდთან შედარებით 76.5 მილიონი აშშ დოლარით, ანუ 42%-ითა გაზრდილი.

2014 წლის იანვარ-სექტემბერში აჭარაში განხორციელებული ინვესტიციები 183,4 მლნ დოლარით განისაზღვრა.

მიმდინარე წელს რეგიონში განხორციელებული ინვესტიციების, ყველაზე მეტი 39 %-ი ენერგეტიკაზე მოდის. ტურიზმს რეგიონში განხორციელებული ინვესტიციების 35 %-ი უკავია, ხოლო მშენებლობის დარგი მიმდინარე წელს ინვესტიციების 19 %-ს დასჯერდა. სოფლის მეურნეობა და მრეწველობა მთლიან ინვესტიციებში თანაბრად 1-1 %-ს ინარჩუნებენ. სხვა დარგებზე კი მთლიანი ინვესტიციების 5 %-ი მოდის.

სტატისტიკური ინფორმაციის მიხედვით, 2015 წლის 9 თვეში აჭარაში განხორციელებული ინვესტიციები 125.2 %-ით (144.5 აშშ დოლარით) მეტია 2012 წლის ანალოგიურ მაჩვენებლებთან შედარებით და ასევე 76.9 %-ით (113 აშშ დოლარით) მეტია 2013 წლის ანალოგიური პერიოდის მაჩვენებლებთან.