ოსი სეპარატისტების ლიდერმა რუსეთს „სულით მშვიდობისმყოფელი“ უწოდა

რუსეთი თავისი სულითა და შინაარსით მშვიდობისმყოფელია, ის უზრუნველყოფს მშვიდობას სირიაში და პლანეტის ბევრ წერტილში. ამის შესახებ ოკუპირებული სამხრეთ ოსეთის ე.წ. პრეზიდენტმა ანატოლი ბიბილოვმა ე.წ. სამშვიდობო მისიის 25 წლისთავის აღსანიშნავ ღონისძიებაზე განაცხადა.

„ხედავთ, რუსეთის ფდერაციის წყალობით როგორ ლაგდება ცხოვრება, ვითარდება რესპუბლიკა, შენდება სოციალური დანიშნულების  ობიექტები, ვითარდება ეკონომიკა. და ეს იმაზე მეტყველებს, რომ რუსეთი თავისი სულით, თავისი შინაგანი შინაარსით ყოველთვის იყო და არის მშვიდობისმყოფელი“, - განაცხადა ბიბილოვმა. მისი თქმით, რუსეთთან პარტნიორობა არავის მისცემს უფლებას ძალადობრივი გზით გადაჭრას საკითხები.

„სტრატეგიული პარტნიორობა რუსეთის ფედერაციასთან არავის აღარ მისცემს უფლებას საკითხების ძალადობრივი გზით გადაჭრის შესახებ იფიქროს. რაც დამახასიათებელია ქვეყნებისთვის, რომლებმაც თავიანთ საქმიანობაში ფაშისტური განწყობა აირჩიეს“, - აღნიშნა სეპარატისტების ლიდერმა.