ნემცოვის მკვლელობაში ბრალდებულს 20-წლიანი პატიმრობა მიესაჯა

საქართველო, თბილისი - 12:39 | 13.07.2017

ნანახია: 1355

რუსი ოპოზიციონერის ბორის ნემცოვის მკვლელობის საქმეში სასამართლომ განაჩენი გამოიტანა.

ზაურ დადაევს, რომელიც ნაფიცმა მსაჯულებმა ნემცოვის მკვლელობაში დამნაშავედ აღიარეს, 20-წლიანი პატიმრობა მიესაჯა. მაშინ როდესაც პროკურატურა სამუდამო პატიმრობას ითხოვდა.

ამის გარდა, მოსამართლემ მას ლეიტენანტის წოდება ჩამოართვა და 100 ათასი რუბლის ოდენობის ჯარიმაც დააკისრა.

ნაფიცი მსაჯულების ვერდიქტით, დადაევი დამნაშავედ ცნეს იმაში, რომ მან 2015 წლის 27 თებერვალს მოსკოვში მოსკვორეცკის ხიდზე ნემცოვს 6-ჯერ ესროლა, რის შედეგადც ოპოზიციონერი გარდაიცვალა.

ოფიციალური ვერსიით, ნემცოვი რელიგიური სიძულვილის საფუძველზე მოკლეს.

გამოძიება დანაშაულის ორგანიზატორად და დამკვეთად ბატალიონ „სევერის“ ოფიცერს რუსლან მუხუდინოვს მიიჩნევს, რომელზეც საერთაშორისო ძებნაა გამოცხადებული.

ნემცოვის ნათესავები მიიჩნევენ, რომ მუხუდინოვს, რომელიც ფაქტობრივად ბატალიონის მეთაურის მოდგილის რუსლან გერემეევის მძღოლად მუშაობდა, დანაშაულის ორგანიზება არ შეეძლო.

ისინი მოითხოვენ მკვლელობაში გერემეევის მონაწილეობის გამოძიებას. თუმცა გამოძიებას ის არ დაუკითხავს, რადგან მასალებშე არ ფიგურირებდა.