11 ივლისი შოკოლადის საერთაშორისო დღეა

ყოველ წელს 11 ივლისს შოკოლადის საერთაშორისო დღე აღინიშნება. დღესასწაული პირველად ფრანგებმა 1995 წელს აღნიშნეს. გავრცელებულია აზრი, რომ შოკოლადის მომზადება პირველად აცტეკებმა დაიწყეს. ისინი მას „ღმერთების საჭმელს“ უწოდებდნენ.

ესპანელმა კონკისტადორებმა, რომლებმაც ის ევროპაში ჩამოიტანეს, შოკოლადს „შავი ოქრო“ უწოდეს და მას ფიზიკური ძალების აღსადგენად იყენებდნენ. მოგვიანებით კი ევროპაში შოკოლადის მოხმარება მხოლოდ არისტოკრატულ წრეებში იყო მიღებული.

მხოლოდ მეოცე საუკუნის დასაწყისში სამრეწველო წარმოების განვითარების შემდეგ, შოკოლადით ტკბობა იმ ადამიანებმაც შეძლეს, რომლებიც არისტოკრატულ ფენას არ განეკუთვნებოდნენ.

მეცნიერების მტკიცებით, შოკოლადი შეიცავს ელემენტებს, რომელიც ხელს უწყობს დასვენებას და გონების გახსნას. შავი შოკოლადი იწვევს ენდორფინების -ბედნიერების ჰორმონების გამოყოფას, რომელიც ზემოქმედებს სიამოვნების ცენტრზე, აუმჯობესებს განწყობას და ამაღლებს ორგანიზმის ტონუსს.

შოკოლადის დღეს სხვადასხვა ქვეყანაში ფესტივალები და თემატური ღონისძიებები იმართება.