თბილისში სპორტული ფილმების ფესტივალი გაიმართება

22-25 ივნისს თბილისში სპორტული ფილმების ფესტივალი (TSFF) გაიმართება. TSFF ამ სახით წელს პირველად ჩატარდება და მიზნად ისახავს ქვეყანაში და რეგიონში სპორტული კინო დოკუმენტალისტიკის პოპულარიზაციას და განვითარებას.

თამარ ჯიშკარიანი, ორგანიზატორი: - აღნიშნულ ფესტივალამდე ჩვენი საორგანიზაციო ჯგუფი 10 წლის მანძილზე ატარებდა სათავგადასავლო და ექსტრემალური ფილმების ფესტივალ „ნიამორს“, რომელშიც 20-ზე მეტი ქვეყანა სისტემატიურად მონაწილეობდა, თუმცა საორგანიზაციო ჯგუფის აზრით, საჭირო გახდა თემატიკის გაზრდა და კონკრეტული სახეობების გარდა ისეთი შინაარსის ფილმების გადაღება, რომელიც ხელს შეუწყობს მოზარდ თაობაში ცხოვრების ჯანსაღი წესის პოპულარიზაციას, აქტიური ცხოვრებით ცხოვრებას, მისცემს ახალგაზრდებს მაგალითს, როგორ შეიძლება იცხოვრო სწორად. მომავალ თაობას და არამხოლოდ მათ, დაეხმარება გაიცნოს სპორტის სხვადასხვა სახეობა, ამ სახეობის ისტორია და ადამიანები, რომლებმაც საქართველოს სახელი სპორტით გაუთქვეს.

ჯიშკარიანის განცხადებით, თავად პროფესიით სპორტულ ჟურნალისტს, ჯერ კიდევ 90-იანი წლებიდან უხდებოდა სპორტის სხვადასხვა სახეობების გაშუქება. ამდენად, რეალურად ხედავდა ყველა იმ პრობლემას თუ ძალისხმევას, რაც თითოეულ სპორტსმენს, სახეობისდა მიუხედავად სჭირდებოდა ელემენტარული შედეგის მისაღწევად - დაფინანსებიდან დაწყებული, ელემენტარული საწვრთნელო გარემოთი დამთავრებული. ყოველივე ამის პირდაპირპროპორციულად ვითარდებოდა სპორტული დოკუმენტური კინოც, შესაბამისად სპორტში ისე მოდიოდნენ და მიდიოდნენ სახელები, რომ მათი თითო კადრიღა თუ არის შემორჩენილი.

„სამწუხაროა, რომ ბოლო წლებში, სპორტული თემატიკა, გერის როლში მოევლინა შესაბამის სფეროს. არადა, კინო (დოკუმენტირიც და მხატვრულიც), არის ის თვალსაჩინოება, რომელსაც ყველაზე კარაგდ იღებს მოზარდი თაობა, უჩნდება მიბაძვის სურვილი. მაგალითად, არის ფილმები მესიზე და დღეს, მთელს მსოფლიოში, ყველა ბავშვს უნდა იყოს მესი. უნდათ, იყვნენ დათო ყიფიანებიც, რადგან გაუგია. თუმცა, ბევრმა ამ თაობაში, არც კი იცის, როგორ გამოიყურებოდა დავით ყიფიანი. 

90-იანი წლებიდან მოყოლებული სპორტში ისე მოვიდნენ და წავიდნენ თაობები, რომ რომელიმე კონკრეტულ ტელევიზიაში, კონკრეტული შედეგის მიღწევის შემდეგ გაკეთებული ერთი სიუჟეტის გარდა, მათ შესახებ ინფორმაცია, უბრალოდ არ არსებობს. მაგალითისთვის შორს არ წავალთ და გიორგი ქინქლაძეს დავასახელებთ, რომელსაც ევროპაში უფრო სცნობენ სახეზე, ვიდრე საქართველოში. ხშირად, მოქმედმა სპორტსმენებმაც კი არ იციან, მათივე სახეობის არც თუ შორეული წარსულის წარმომადგენლის შესახებ. მაგალითად, თანამდეროვე დინამოელებს, არც კი ჰქონდათ გაგონილი 1981 წლის „დინამოს“ ერთ-ერთი გმირის, თამაზ კოსტავა სსახელიც კი“, - ამბობს თამარ ჯიშკარიანი და ამატებს, რომ სასაიამოვნოა სხვა დატვირთვის მრავალი საერთაშორისო ფესტივალის შემდეგ რომელიც ქვეყნის და ჩვენი ქალაქის პოპულარობას ზრდის, TSFF ის ნიშაა, რომელიც თბილისს, კიდევ ახალ ჭრილში დაანახებს საერთაშორისო საზოგადოებას. მითუმეტეს, რომ თბილისი, უკვე ასოცირდება სპორტთან, აქ გამართული მრავალი საერთაშორისო ღონისძიებიდან გამომდინარე.

„ფესტივალის დაარსებიდან დღემდე, როდესაც დგება მისი დაფინანსების საკითხი, სიტყვა „სპორტი“ ხდება განსჯის საგანი, არის თუ არა სპორტული თემატიკის ფილმი კულტურის ნაწილი. თუ კინემატოგრაფიის, თუნდაც ქართულის, ისტორიას გადავხედავთ (ასევე ფოტო-ხელოვნების და მწერლობის, თუნდაც ქართველ წარმომადგენლებს გავიხსენებთ გურამ თიკანაძე და გურამ რჩეულიშვილი) დოკუმენტური ფილმები მიხეილ მესხზე, მთამსვლელ ჯაფარიძეებზე, გიორგი ნიკოლაძეზე, ასევე მხატვრული ფილმები: „როცა აყვავდა ნუში“, „ფეოლა“, „პირველი მერცხალი“, „ბურთი და მოედანი“, „რეკორდი“ და ა.შ.  სპორტი, ისეთივე კულტურის ნაწილია, როგორც „მევენახე“, „მშენებელი“, „კოლმეურნე“ და „გივი“... აღნიშნული მხატვრული და დოკუმენტური ფილმები, ყოველთვის იყო მისაბაძი მაგალითი თაობებისთვის.“

თბილისის სპორტული ფილმების ფესტივალი (TSFF), სწორედ ამ ხარვეზების გამოსწორებას ცდილობს და ასევე, ხელს უწყობს საქართველოში კონკრეტულ დროში, შეიქნმას მატიანე კონკრეტულ ადამიანებზე. ამას გარდა, საქართველოშიც ნახონ ის ტენდენციებიც რაც სპორტული კინოს მიმართებით ვითარდება მსოფლიოში. აღნიშნული ფესტივალი მიზნად ისახავს რეგიონში შესაბამისი თემით დაინტერესებული კინოდოკუმენტალისტების თავმოყრას, აზრთა გაცვლას და დაახლოებას.

TSFF – 2017 საქართველოს სპორტისა და ახალგაზრდობის საქმეთა სამინისტროს და თბილისის მერიის ხელშეწყობით იმართება.