GCAA საქართველოში რეგისტრირებულ ავიაკომპანიებს, ICAO-ს რეკომენდაციების გათვალისწინებას ურჩევს

საქართველო, თბილისი - 17:00 | 04.11.2015

ნანახია: 2109

სამოქალაქო ავიაციის სააგენტო (GCAA), საქართველოში რეგისტრირებულ ავიაკომპანიებს, ფრენების დაგეგმარებისას და რისკების შეფასებისას ICAO-ს რეკომენდაციების გათვალისწინებისკენ მოუწოდებს, რათა მათ ფრენისთვის ალტერნატიული მარშრუტები გამოიყენონ.
ICAO-ს მიერ, წევრი სახელმწიფოებისათვის დაგზავნილ წერილებზე და EASA-ს ფრენის უსაფრთხოების ბიულეტენებზე დაყრდნობით, სამოქალაქო ავიაციის სააგენტო კიდევ ერთხელ ავრცელებს იმ რეგიონების ჩამონათვალს რომელთა საჰაერო სივრცის თავზე, აღნიშნულ რეგიონებში მიმდინარე საბრძოლო მოქმედებების გამო, შექმნილია მაღალი რისკი სამოქალაქო ფრენების უსაფრთხოებისათვის:
დამასკო (სირია);
დნეპროპეტროვსკი, სიმფეროპოლი (უკრაინა);
ბაღდადი (ერაყი);
ტრიპოლი (ლიბია);
ქაბული (ავღანეთი);
ლაჰორი, კარაჩი (პაკისტანი);
სანაა (იემენი);
ხართუმი (სუდანი, სამხ. სუდანი)
თეირანი (ირანის ჩრდ.დასავლეთით)
მოგადიშუ (სომალი)
საბრძოლო მოქმედებების რეგიონებში იარაღიდან, ყუმბარმტყორცნებიდან, ნაღმტყორცნებიდან, ქვემეხებიდან და პორტატული საჰაერო თავდაცვის სისტემებიდან (MANPADS) ცეცხლის შესაძლო გახსნის გამო, განსაკუთრებით რისკის შემცველია ფრენები FL260 (7924მ.) ეშელონზე და მის ქვემოთ.
როგორც ცნობილია, 31 ოქტომბერს, სინაის ნახევარკუნძულის ცენტრალურ ნაწილში რუსული ავიაკომპანიის კუთვნილი სამგზავრო თვითმფრინავის ავიაკატასტროფის გამომწვევი ზუსტი მიზეზის დადგენამდე, რამდენიმე ავიაკომპანიამ სინაის ნახევარკუნძულის მიმართულებით ფრენების დროებით შეჩერების გადაწყვეტილება მიიღო. აღნიშნული რეგიონის ჩრდილოეთ ნაწილის საჰაერო სივრცის თავზე ფრენების უსაფრთხოებისათვის შექმნილი მაღალი რისკის გამო, ალტერნატიული მარშრუტებით სარგებლობის რეკომენდაცია EASA-ს ბიულეტენზე დაყრდნობით, სამოქალაქო ავიაციის სააგენტოს მიერ, გასული წლის ნოემბრიდან ქართულ ავიაკომპანიებსაც მიეცათ.