სიმღერის Keep the Faith ვიდეორგოლის პრეზენტაცია „C სტუდიაში“ 6 მაისს შედგება (ვიდეო)

საქართველო, თბილისი - 15:00 | 05.04.2017

ნანახია: 1556

2017 წლის ევროვიზიის სიმღერის კონკურსში საქართველოს წარმომადგენლის, თამარა გაჩეჩილაძის სიმღერის - Keep the Faith ვიდეორგოლის პრეზენტაცია საზოგადოებრივი მაუწყებლის პირველი არხის გადაცემა "C სტუდიაში" 6 მაისს შედგება.

სიმღერის Keep the Faith ვიდეორგოლის რეჟისორია თემურ კვირკველია.

საზოგადოებრივი მაუწყებლის რეჟისორმა თემურ კვირკველიამ გადაიღო 2013 წლის ევროვიზიის სიმღერის კონკურსში საქართველოს წარმომადგენლების სოფო გელოვანისა და ნოდიკო ტატიშვილის სიმღერის - Waterfall ვიდეორგოლი, მასვე ეკუთვნის 2016 წლის ევროფესტივალის ქართველი მონაწილეების ნიკა კოჩაროვისა და ჯგუფის Young Georgian Lolitaz სიმღერის - Midnight Gold კლიპი.

სიმღერის Keep the Faith ავტორები ანრი ჯოხაძე და თამარა გაჩეჩილაძე არიან.

საქართველოს დელეგაცია კიევში 29 აპრილს გაემგზავრება. თამარა გაჩეჩილაძე პირველ რეპეტიციას 30 აპრილს გაივლის, რის შემდეგაც ჟურნალისტებს შეხვდება. გაჩეჩილაძე ევროფესტივალის პირველ ნახევარფინალურ საღამოზე, 9 მაისს, მეორე ნომრად იმღერებს.

ევროვიზიის სიმღერის რიგით 62-ე კონკურსს კიევი მასპინძლობს. გრანდიოზული შოუს ნახევარფინალები 9 და 11, ხოლო ფინალი 13 მაისს ჩატარდება.