სამოქალაქო ავიაციის სააგენტო: ზამთრის სეზონზე საქართველოს აეროპორტებიდან კვირაში 208 რეისი განხორციელდება

მარტის ბოლომდე საქართველოს აეროპორტებიდან კვირაში 208 რეისი განხორციელდება. სამოქალაქო ავიაციის სააგენტოს ინფორმაციით, ზამთრის სეზონის დროს საქართველოს აეროპორტებიდან, კვირის განმავლობაში, 208 რეისი განხორციელდება (იმ შემთხვევაში თუ არ გაუქმდა რეისები და შესრულდება ყველა დამტკიცებული ფრენა).

სტატისტიკური ინფორმაციის მიხედვით, ზამთრის სეზონზე დაგეგმილი ფრენების დიდი ნაწილი - 84.2%-ი თბილისის საერთაშორისო აეროპორტზე მოდის, ხოლო ბათუმის საერთაშორისო აეროპორტიდან დაგეგმილი ფრენების 9.5%-ი განხორციელდება, ხოლო ქუთაისის საერთაშორისო აეროპორტის წილი მხოლოდ 6,3 %-ი იქნება.

რაც შეეხება მესტიის თამარ მეფის სახელობის აეროპორტს,  სამოქალაქო ავიაციის სააგენტოს ინფორმაციით, ზამთრის განმავლობაში ფრენები ხორციელდება მხოლოდ იმ შემთხვევაში, როდესაც არის ფრენისათვის ხელსაყრელი ამინდი, ამიტომ სააგენტოში ზამთრის სეზონისთვის ფრენების სიხშირის პროგნოზირება უჭირთ.

სამოქალაქო ავიაციის საანეგტოში განმარტავენ, რომ ზამთრის სეზონზე თბილისის საერთაშორისო აეროპორტიდან ავიარეისები შემდეგი მიმართულებით განხორციელდება: ათენი, ალმაატა, ამსტერდამი, აქტაუ, ბათუმი, ბაღდადი, ბაქო, დოჰა, დუბაი, ერბილი, ერევანი, ვარშავა, ვენა, თეირანი, თელავივი, კიევი, მინსკი, მიუნხენი, მოსკოვი, რიგა, სალონიკი, სანკტ-პეტერბურგი, სტამბული, ოდესა, ურუმჩი, შარმ ელ შეიხი, შარჟა, ქუთაისი, ჰურგადა.

ბათუმიდან ფრენები განხორციელდება თბილისის, თელავივის, კიევის, მინსკის, მოსკოვისა და სტამბულის მიმართულებით.

ხოლო რაც შეეხება ქუთაისის საერთაშორის აეროპორტს, ფრენები ბუდაპეშტის, ვარშავას, ვილნიუსის, თბილისის, კიევის, მოსკოვისა და სტამბულის მიმართულებით იგეგმება.

უკვე გაწერილი გეგმის მიხედვით, ზამთრის სეზონზე საქართველოს აეროპორტებში ოპერირებას მოახდენენ ავიაკომპანიები: Georgian Airways-ი, Aegean Airlines-ი, Air Astana-ი, Scat-ი, Fly Baghdad-ი, Azerbaijan Airlines-ი, Qatar Airways-ი, FlyDubai, LOT-ი, ATA Airlines-ი, Ukraine International Airlines-ი, YAN AIR-ი, Belavia, Lufthansa, Aeroflot-ი, S7 Airlines-ი, Air Baltic-ი, ELLINAIR-ი, Ural Airlines-ი, Turkish Airlines-ი, Pegasus-ი, Atlasglobal-ი, China Southern Airlines-ი, Air Cairo, Air Arabia და Wizz Air Hungary.

შეგახსენებთ, რომ ზამთრის სეზონი ოქტომბრის ბოლო კვირიდან მარტის ბოლო შაბათამდე პერიოდს მოიცავს.