სკარლეტ იოჰანსონი ქმარს შორდება

ამერიკლეი მსახიობი სკარლეტ იოჰანსონი ქმარს - წარმოშობით ფრანგ ჟურნალისტს რომენ დორიაკს შორდება.

როგორც New York Post-ი იტყობინება, მან ნიუ-იორკის უზენაეს სასამართლოში საბუთები 7 მარტს შეიტანა და განაცხადა, რომ მისი ქორწინება ”უიმედო და დანგრეულია”.

გამოცემა აღნიშნავს, რომ მსახიობს 2 წლის ქალიშვილზე როუზ დოროთი დორიაკზე მეურვეობის მოპოვება სურს. ადვოკატის თქმით, იგივეს ცდილობს მისი ქმარიც.

”ის გეგმავს ქალიშვილთან ერთად საცხოვრებლად საფრანგეთში დამკვიდრდეს, მისის იოჰანსონი კი ბევრს მოგზაურობს”, - განაცხადა რომენ დორიაკის ადვოკატმა.

ჟურნალისტები იოჰანსონისა და დორიაკის განშორების შესახებ ჯერ კიდევ იანვარში წერდნენ. მსახიობი პრეზიდენტ დონალდ ტრამპის საწინააღმდეგო ქალთა მარშზე ქორწინების ბეჭდის გარეშე მივიდა, წყვილი კი ერთად ბოლოს 2016 წლის ოქტომბერში ნახეს.

იოჰანსონისა და დორიაკის რომანის შესახებ ცნობილი 2012 წელს გახდა. წყვილი 2014 წლის მარტში დაქორწინდა. იოჰანსონისთვის ეს მეორე ქორწინებაა, მანამდე ის სამი წლის განმავლობაში მსახიობ რაიან რეინოლდსზე იყო დაქორწინებული.