მიშა მესხი: სოფო ფეხმძიმედ იყო და მუცელი მოეშალა

მომღერალ სოფო ბედიას პოლიტიკოს ქმარს, მიშა მესხს, ახალ წელს ცოლის გამო ქეიფზე უარის თქმა უწევს, რადგან ამ დროს ყოველთვის საყვარელი ქალის გვერდით, მის კონცერტებზეა. 2 იანვრიდან ძველით ახალ წლამდე კი ყველა დღე მისია და კარგადაც მოილხენს ხოლმე.
წყვილის ქორწინება ორ წელს ითვლის. 2017 წლისგან ნანატრი შვილის იმედი და მოლოდინი აქვთ. სოფომ და მიშამ ახალი წლის საოჯახო ტრადიციებზე და ოჯახურ ცხოვრებაზე "სარკესთან" ინტერვიუში ისაუბრეს. 

ერთმანეთის ჩაცმულობას აკონტროლებთ?
სოფო: მიშა ჩემს ჩაცმულობაში ნაკლებად ერევა. ერთადერთი, რაც არ მოსწონს, ღრმა დეკოლტეა, არადა ვგიჟდები! უარის თქმა არ მომიწია, თუმცა სიღრმეები ცოტა ამოვავსე. სხვათა შორის, საჩუქრად კაბებიც მოაქვს და ისეთი, რომ ყოველთვის მერგება.
მიშა: არც სოფო ერევა ჩემს ჩაცმულობაში. რასაც ვყიდულობ, ყველაფერი მოსწონს. მეც ყველაფერი მომწონს მის ტანზე, ღრმა დეკოლტეს გარდა!

სრული ბედნიერებისთვის რა სჭირდება თქვენს წყვილს?
მიშა: სრული ბედნიერებისთვის ჩვენი პატარა გვჭირდება და იმედია, 2017 წელს გვეყოლება. შეკითხვებზე პასუხებითაც დავიღალე. ზოგს შეიძლება ჰგონია, რომ პრობლემა გვაქვს და მათ გასაგონად ვიტყვი, რომ ყველაფერი რიგზეა. სოფო ფეხმძიმედ იყო და მუცელი მოეშალა. ღვთის წყალობით, გვჯერა, რომ ყველაფერი კარგად იქნება და ბევრი შვილი გვეყოლება.
სოფო: ჩვენი მთავარი მიზანია, პატარა გვყავდეს და დარწმუნებული ვარ, ღმერთი გადმოგვხედავს და გვეყოლება.

ჟურნალი "სარკე"