ქუმსიშვილმა გუდაურში სამშენებლო სამუშაოები დაათვალიერა

პირველი ვიცე-პრემიერი, ეკონომიკისა და მდგრადი განვითარების მინისტრი დიმიტრი ქუმსიშვილი გუდაურს ეწვია და სამშენებლო სამუშაოები დაათვალიერა.

ეკონომიკის სამინისტროს მონაცემებით, გუდაურის სამთო-სათხილამურო ინდუსტრიის განვითარების საერთო პოტენციალის ზუსტი დადგენისთვის 2016 წელს კანადურმა კომპანია „ეკოსაინმა“ შეიმუშავა მიწათსარგებლობისა და განვითარების გენერალური გეგმა.

გუდაურის განვითარების გეგმა ფუნდამენტური დოკუმენტია კურორტის სწორი დაგეგმარებისა და განვითარების კუთხით. მასტერპლანმა გამოავლინა, თუ რა კუთხით უნდა გაგრძელდეს კურორტის განვითარება, ასევე მოიცავს განვითარების ისეთ უმნიშვნელოვანეს კომპონენტებს როგორიცაა საბაგიროების განლაგება და მშენებლობა, სათხილამურო გზების მომზადება, საჭირო აღჭურვილობის ეფექტური რაოდენობის განსაზღვრა, ხელოვნური გათოვლიანების სისტემის მოწყობა, ავტოსადგომის, გასართობი და კების ობიექტები, მოთხილამურთა ოპტიმალური პოზიციონირება, სანიაღვარე გეგმა და სხვა.

განვითარების გეგმის პირველი ეტაპი  მოიცავს 2400 მეტრიანი, 6 კაციანი ღია სავარძლის ტიპის საბაგიროს მშენებლობას და ორ საჩოჩიალოს. პირველი ვიცე-პრემიერმა დაათვალიერა, როგორც საბაგიროს მშენებლობის პროცესი, ასევე სასტუმროების მშენებლობაც.

საბაგიროს მშენებლობას ახორციელებს  Black sea Group, კურორტზე  კი მონტაჟდება მსოფიოში ერთ-ერთი წამყვანი მწარმოებლის Doppelmayr-ის საბაგირო.

2011-2012 წლების ზამთრის სათხილამურო სეზონთან შედარებით  2015-2016 წლები საგრძნობლად პროგრესირებს. ვიზიტორების რაოდენობა 127%-ით არის გაზრდილი, ხოლო მრავალჯერადი ბილეთების გაყიდვის რაოდენობა 311%-ით. მრავალჯერადი ბილეთების მომხმარებლები კი ძირითადად უცხოელი ტურისტები არიან.

საქართველოს რეგიონული განვითარებისა და ინფრასტრუქტურის განვითარების სამინისტრო აქტიურად მუშაობს გუდაურში წყალსადენისა და წყალარინების სისტემის სრული რეაბილიტაციაზე.  კურორტის ისტორიაში პირველად იქნება საკმარისი წყლის დებეტი.