თხუთმეტმა კერძო და არასამთავრობო ორგანიზაციამ კოალიცია ფინანსური განათლებისთვის დააფუძნა

თხუთმეტმა კერძო და არასამთავრობო ორგანიზაციამ კოალიცია ფინანსური განათლებისთვის დააფუძნა. ახლადშექმნილი კოალიციის ოფიციალური პრეზენტაცია 20 ოქტომბერს, 12:00 საათზე, სასტუმრო „რუმს ჰოტელ თბილისში“ გაიმართება.

კოალიცია ფინანსური განათლებისთვის არის კერძო სექტორის ინიციატივა, რომლის მიზანია საქართველოს მოქალაქეების ფინანსური განათლების დონის ამაღლება. ფინანსური განათლება მოიცავს ცოდნას, უნარ-ჩვევებს, დამოკიდებულებებსა და მოტივაციას, რომელსაც მომხმარებელი იყენებს ფინანსური გადაწყვეტილებების მიღების დროს.

კოალიცია აპირებს კერძო აქტორების მობილიზებას, რათა დაეხმაროს მის წევრებს სათანადო კოორდინაციითა და გამოცდილების გაზიარებით, ხელი შეუწყოს საჯარო სექტორთან თანამშრომლობას. ახლადშექმნილი ორგანიზაციის ერთ-ერთი პირველი მიზანი ფინანსური განათლების ეროვნული სტრატეგიის შემუშავება და განხორციელებაა.

ღონისძიებას, რომელზეც მოხდება კოალიციის ხედვის, მიზნებისა და სამომავლო გეგმების პრეზენტაცია, დაესწრებიან საქართველოს აღმასრულებელი, საკანონმდებლო და სასამართლო ხელისუფლების, ასევე ფინანსური სექტორის წარმომადგენლები, მარეგულირებლები, დიპლომატიური კორპუსის, სამოქალაქო საზოგადოებისა და მედიის წარმომადგენლები.