გია ცაგარეიშვილი: პარლამენტში „ოცნება“ და „ნაციონალები“ ერთმანეთს ასაზრდოვებენ

„პრაიმნიუსჯორჯია“ საპარლამენტო ოპოზიციის წარმომადგენელს, „თავისუფალი დემოკრატების“ წევრს, გია ცაგარეიშვილს ესაუბრა:

- თქვენი რამდენიმე მოწვევის პარლამენტის წევრობის მუდმივი მახასიათებელი ოპოზიციონერი დეპუტატის ამპლუაა. 2012 წელს, კოალიცია „ქართული ოცნების“ საარჩევნო სიით პირველად გახდით საპარლამენტო უმრავლესობის წევრი, მაგრამ მალე ისევ ოპოზიციონერობა მოგიწიათ. ხომ არ ფიქრობთ, რომ ხელისუფლებაში ყოფნა საკმაოდ მძიმე და საპასუხისმგებლო საქმეა, მისი კრიტიკა კი, პოლიტიკურად მომგებიანია და თქვენთვის ასე სჯობს?

-დააკვირდით, როცა „თავისუფალი დემოკრატები“ კოალიციიდან გამოვედით, ეს იყო 2014 წლის 4 ნოემბერი და თუ მკითხავთ, თარიღი რატომ გახსოვსო, მე გეტყვით, რომ ამ დღეს საკუთარი პირმშო დავტოვე. "ქართული ოცნება" ჩემი ხელებით შექმნილი იყო და შემიძლია დიდი გულისტკივილით გითხრათ, რომ პიროვნულად ჩემთვის მძიმე დღეები გადავიტანე, რადგან ვტოვებდი იმ პოლიტიკურ გაერთიანებას, სადაც უდიდესი შრომა ჩავდე პირდად, ასევე ჩემმა თანაპარტიელებმა და "თავისუფალმა დემოკრატებმა". თავის დროზე ეს ურთულესი და დიდ გათვლებთან დაკავშირებული საქმე იყო, შემდეგ რაც მოხდა, უბრალოდ, ჩვენი იქ გაჩერება წარმოუდგენელი გახდა.

-„კაბელების საქმის“ სკანდალამდე საამისო განწყობა არ ჩანდა და ერთ დღეში „თავისუფალი დემოკრატების“ ლიდერმა თანაპარტიელებთან ერთად სახელმწიფოებრივი ინტერესებიც კი, საფრთხისა და ეჭვის ქვეშ დააყენა. რამდენად გულწრფელი იყავით მაშინ და რა შედეგი მოუტანა პარტიას საზოგადოების თვალში?

-როცა შენი პარტიული ლიდერის დაჭერა უნდათ, იჭერენ „თავისუფალი დემოკრატებიდან“ 5 ადამიანს (რომლებიც სხვათაშორის, დღეს თავისუფლებაში არიან და სამსახურშიც აღადგინეს) და მათ ეუბნებიან, იქნებ, ირაკლი ალასიანიაზე რამე თქვათ, რომ ცხრაკლიტულში გამოვკეტოთ კოალიციის ერთერთი ლიდერი, თანამებრძოლი და მთავრობის მინისტრიო, ეს ჩემთვის ერთგვარი ტესტი იყო, გამძლეობასა და გამოცდაზე, რაც მანამდე მიკეთებია. მე ისე უკუღმართად არ მიცხოვრია, რომ ადამიანისთვის მეღალატოს, ცხოვრებაში ღალატი არ ჩამიდენია. კი ბატონო, მივდიოდი პარტიიდან, მაგრამ ისინი ღალატობენენ გიორგი ცაგარეიშვილს. გავიხსენებ, "მრეწველებს", გავიხსენებ გია თორთლაძეს და სხვებს, რომლებიც მეუბნებოდნენ ერთს და აკეთებდნენ მეორეს. ასეთ ადამიანებთან კონკრეტულ პოლიტიკურ პროექტში ვეღარ მივიღებდი მონაწილეობას და ყოველგავრი ზედმეტი ვნებათაღელვის გარეშე ვემშვიდობებოდი და მოვდიოდი იმ პარტიიდან. ირაკლი ალასანიას საპარლამენტო გუნდის წევრები გვერდით რომ გავწეულიყავით და გევთქვა, წადი ძმაო, ჯერ გაარკვიე "კაბელების საქმე", მერე მოდი და ჩვენ ან დაგიდგებით გვერდით, ან არ დაგიდგებითო, ეს ღალატი არ იქნებოდა?

-ადამიანურად ეს ყველაფერი გასაგებია, მაგრამ განცხადებები, რომ „ქართულ ოცნებას“ „თავისუფალი დემოკრატები“ ხელისუფლების საგარეო კურსის ცვლილების გამო ტოვებდნენ, იმდენად არადამაჯერებელი არ იყო, რომ თქვენი პარტია საზოგადოებაში სასურველ სიმპატიას ვეღარ დაიმსახურებდა?

-საგარეო კურსის ცვლილება არცერთ შემთხვევაში არ იყო არადამაჯერებელი და ამაზე მეტყველებს დღევანდელი დღე, როცა ხელიუფლების წარმომადგენლები საზოგადოების ზურგს უკან დაბრძანდებიან და "გაზპრომთან" მოლაპარაკებებს აწარმოებენ. ბევრი ხილული და უხილავი ტენდენციები არსებობს ჩემთვის და ჩემი კოლეგებისთვის. არდამაჯერებელი შეიძლება ვიღაცისთვის იყო და ჩვენ გვქონდა შესაბამისი ინფორმაცია. აქცენტებს მთავრობის ხელმძღვანელობა, ასევე მთავრობის არაფორმალური მმართველი ბიძინა ივანიშვილი ისე აკეთებდა, რომ ჩვენ ჩამოგვიყალიბდა რწმენა, რომ დიახაც, პროევროპული ორიენტაციის ადამიანებს ებრძვიან საქართველოს მთავრობაში და უნდათ მათი გაწევა საერთო გუნდიდან. გამოვთქვით ეს ვარაუდი და ვთქვით, რომ არსებობს საშიშროება, რომ საქართველომ კურსი შეიცვალოს. მე ამ საშიშროებას ახლაც ვხედავ, როგორ იზრდება რუსოფილური განწყობები ქვეყანაში, როგორ მძლავრობენ რუსეთუმეები, როგორ შემოდის ქვეყანაში უზარმაზარი ნაკადით შავი და თეთრი ფული.

- კონკრეტული ფაქტების გარეშე და პერმანენტული სახით განცხადებების კეთება ისეთი სერიოზული პოლიტიოსებისა და პარტიების მხრიდან, რომლებსაც ხელისუფლებაში მოსვლაზე პრეტენზია გააჩნიათ, თქვენი აზრით, როგორ შთაბეჭდილებას ქმნის?

-რატომ ხართ ასე შეჭმუხნული, ნინო ბურჯნაძე არ არის რუსეთუმე?

-ნინო ბურჯანაძე "ქართულ ოცნებაში" "თავისუფალი დემოკრატების" შესვლა-გასვლამდეც პოლიტიკაში იყო და მისი მოღვაწეობის ის წლებიც მახოვს, როცა მისი პროდასავლურობა ეჭვქვეშ არ დამდგარა....

-მე გეკითხებით, არის თუ არა ნინო ბურჯანაძე რუსული ორიენტაციის?

-რით შეიძლება დავრწმუნდე ნინო ბურჯანაძის ორიენტაციაში, თუკი არ დამანახებთ ინფორმაციას საიდან ფინანსდება მისი პარტია, ზოგიერთი პოლიტიკოსის აზრით, ნინო ბურჯანაძე "ქართულად პრორუსულია," რომელსაც გარკვეული პრობლემების ქვეყნისთვის სასიკეთოდ გადაჭრა რუსეთის მეშვეობით მიაჩნია შესაძლებლად, მაგრამ სხვა საქმეა, ვეთანხმებით, თუ არ ვეთანხმებით...იქნებ, როგორც პოლიტიკოსმა ბრალდება არგუმენტებით გაამყაროთ?

-რას ნიშნავს „ქართულად პრორუსული“, მასეთი ერთი სერგო ორჯონიკიძე იყო და მეორე ფილიპე მახარაძე. თქვენ ამბობთ, რომ ზოგიერთებს უნდათ, მზე ქართული სულისკვეთებით ჩრდილოეთიდან ამოდიოდეს. ვინ მოგვიწყო 2008 წელში აქ სასაკლაო, ვინ დაგვიხოცა გიორგი ანწუხელიძე და „შინდისელი ბიჭები“, ან მანამდე 300 ათასი დევნილი ვინ გამოგვიგაზვნა? შთაბეჭდილბები ადამიანების გვამებზე გადის, რომლებიც უგვანო მიხეილ სააკშვილმა მიატოვა და ომის ადგილიდან პატრიარქმა გამოიყვანა. ნინო ბურჯანაძე ერთი თვე მოსკოვში იყო და რა ბრალდება უნდა გამყარდეს. ჩემი აზრით, ვინც მოსკოვში დადის, ის რუსეთუმეა. ნინო ბურჯანაძე ბოლო დროს, საქმიანი ვიზიტით ამერიკასა და ევროპაში ჩასული აღარ მინახავს, მახსოვს, რომ ადრე ერთ დელეგაციაში ვიყავით და ერთად გვაქვს ამერიკა-ევროპა მოვლილი. როგორც კი ხელისუფლებაში აღარ მოხვდა, ორიენტაცია შეიცვალა. ის პოლიტიკური ძალები, რომლებიც რუსეთის პოლიტიკურ ძალებთან თანამშრომლობენ, ჩემთვის პრორუსულად განწყობილი ძალები არიან. ზოგადად, პრორუსული განწყობაც და პოლიტიკოსიც ამ ქვეყნისთვის საფრთხეს წარმოადგენს, რომლის უმარავი მოქალაქეც საქართველოს ტერიტორიულ მთლიანობას შეეწირა. მაშინ, რისთვის იყო ომები ამ ქვეყანაში და საერთოდ, რისთვის გვაქვს "მამა დავითი". პოლიტიკოსი, რომელიც ამბობს, რომ საქართველოს საშველი რუსეთშია, ჩემთვის პრორუსი. პოლიტიკოსი, რომელიც ამბობს, რომ რუსეთი ამ ქვეყნის მტერია, ევროკავშირთან ასოცირების შეთანხმებას აწერს ხელს და ამბობს, რომ ევროატლანტიკური სივრცე არის ადგილი, სადაც საქართველომ თავისი კუთვნილი ადგილი დაიკავოს, მიმაჩნია, რომ არ არის რუსეთუმე.

-ამის შესახებ საქართველოს მთავრობა ყველა საერთაშორისო ოგანიზაციის ტრიბუნიდან აცხადებს, მაგრამ ოპოზიციის უპირველეს ბრალდება მაინც მისი პრორუსულობაა ...

-აქვე ვამბობ, რომ პროდასავლელიც ბევრი მინახავს მახინჯი განწყობის, კორუმპირებული, საქმით გაიძვერა და ამის ერთ-ერთი მაგალითი მიხელ სააკაშვილი იყო თავის რეჟიმიანად. მიხეილ სააკაშვილი ამერიკასა და ევროპაში რომ დაეხეტებოდა, ამ უბედურ ქვეყანაში არაფერი იცვლებოდა. სწორედ ამან გამოიწვია ცუდი ტენდენციები ქვეყანაში, როცა გაერთიანებული ოპოზციის წარმოამდგენლები უცხოელ პარტნიორებს ვესაუბრებოდით, ყოველთვის ვეუბნებოდით, რომ მიხეილ სააკაშვილი საქართველოს განსახიერება არ იყო და სხვა პროდასავლური ძალებიც იყვნენ პოლიტიკურ კოალიციებში.

-საგარეო აქცენტებზე განწყობების შექმნის პოლიტიკა, რამდენად საიმედო შეიძლება იყოს საპარლამენტო არჩევნებში მონაწილე საზოგადოების მხარდაჭერის მოსაპოვებლად?

-ორგანიზაცია „ევრაზიული კავშირი არსებობს“ და მოუსმინეთ, რას ლაპარაკობენ. ხელისუფლების წევრებს სულ უნდა ვუყურადოთ, რომ ასეთი განწყობები არ მომძლავრდეს ხელისუფლებაშიც, თორემ არასამთავრობოების აზრი იცით, როგორ ადვილად შეიძლება სამთავრობო და საზოგადოებაში გაბატონებული აზრი გახდეს? თავდაცვის მინისტრი თინა ხიდაშელი ამბობს, რომ თუ ნატოში არ მიგვიღებთ, რუსეთუმეები მოგვადგნენო. თუ გაითვალისწინებთ, რომ ის ჩემგან განსხვავებით, მთავრობის წევრი და „რესპუბლიკელია“, მაშინ რატომ ამბობს, რომ რუსეთუმეები კარზე გვიკაკუნებენ? თავდაცვის მინიტრი თუ ამბობს, მე რომ იგივე ვთქვა, ვიტყუები?

-„ქართული ოცნება“ „თავისუფალ დემოკრატებს“ „ნაციონალების“ ოპოზიციურ პარტიად და შესაბამისად, საპარლამენტო არჩენებში მეორე ადგილის მოსაპოვებლად ბრძოლაში ერთმანეთის კონკურენტ ძალებად მოგიაზრებთ. არადა, თქვენს პირველ ადგილზე გასვლის ამბიცია აქვს. მომავალ საპარლამენტო არჩევნებში რამდენად რეალურია თქვენი შანსები?

-მე რომ ეგ მადარდებდეს, სახელისუფლებო გუნდი სად და რად მომიაზრებს, ან რას ფიქრობს ჩემზე, მაშინ ისევ იქ ვიქნებოდი. ჩვენ ჩვენი გზა გვაქვს და ვადგავართ იმ გზას. დღეს გლდანში მეორე სადამფუძნებლო ყრილობა გვქონდა, რომელსაც 400 ადამიანი ესწრებოდა, პარტიაში უამრავი ადამიანი წევრიანდება, ნოემბერ-დეკემბერში თბილისში პარტიის ოფისი ყველა რაიონში იქნება. შიდაპარტიული საქმიანობა და მისი შედეგები მაძლევს იმის თქმის საშუალებას, რომ ჩვენ შეიძლება ძალიან დიდ წარმატებას მივაღწიოთ საპარლამენტო არჩევნებში. ძალა, რომელიც მხოლოდ ოლიმპიური პრინციპის გამო მონაწილეობს არჩვენებში, რომ მთავარია მონაწილეობა და არა - გამარჯვება, ჩემი აზრით, პოლიტიკაში არ უნდა იყოს. უნდა იყო მაქსიმალისტი და მეტი გინდოდეს. „თავისუფელი დემოკრატები“ გამარჯვებაზე ორიენტირებული პოლიტიკური ორგანიზაცია და ქვეყანაში ბევრი მტერი გვყავს.

-ვინ არიან თქვენი მტრები?

-პირველ რიგში, „ნაციონალური მოძრაობიდან“, რომლებსაც ერთი სული აქვთ, რომ ბევრი ბიძური იარლიყები მოგვაწებონ და საკუთარ თავთან გაგვაიგივონ. „ნაციონალურ მოძრაობას“ ეს არ გამოუვა. მეორე - „ქართული ოცნება,“ რომელსაც სურს, რომ პოლტიკურ ასპარეზზე მხოლოდ „თეთრი და შავი“ დატოვოს, არადა, ყველა აქვს ასპარეზზე ყოფნის უფლება. მე შეიძლება ვიღაცას რუსეთუმედ ვაცხადებდე, მაგრამ აქვე შემიძლა სრული პასუხისმგებლობით გითხრათ, რომ ასეთ ადამიანებსაც აქვთ პოლიტიკაში არსებობის უფლება. ხალხმა უნდა გადაწყვიტოს, ხელისუფლებაში პრორუსული, პროდასავლური, მემარჯვენეები თუ მემარცხეენები, ლიბერალები, თუ კონსერვატორები უნდა მოვიდნენ.

-მას შემდეგ, რაც „ქართული ოცნება“ დატოვეთ და საპარლამეტო ოპოზიცია გახდით, საკანონმდებლო თვალსაზრისით მნიშვნელოვანი რა გააკეთეთ?

-სამწუხაროდ, პარლამენტში 8 წვერით ვართ წარმოდგენილი და იცით, რასაც ნიშნავს 90 კაცთან კამათი, რომლებსაც ერთმანეთის გარდა, არც არავინ აინტერესებთ. პარლამენტში „ოცნება“ და „ნაციონალები“ ერთმანეთს ასაზრდოვებენ და მათ შორის ზღვარი აბსოლუტურად წაშლილია.

-რატომ?

-მაგალითად, სიტყვის პირდაპირი მნიშვნელობით მე გამომდევნეს კოალიციიდან და მიიღეს მარიკა ვერულაშვილი, გამოდევნეს ზურა აბაშიძე და გურამ მესაბიშვილი, გამოდევნეს ვიქტორ დოლიძე და მიიღეს კახაბერ ოქრიაშვილი... ის, რაც მუნიციპალიტეტებში ხდება, ამაზე მართლა გპირდებით, რომ პირადად გამოვამჟღავნებ „ქართულ ოცნებაში“ პორტირებულ „ნაციონალებს“. ეს ეხება ყვლა რაიონს, დაწყებულს ხელვაჩაურიდან და ლაგოდეხით დასრულებული.

-თუკი ამის გაკეთებას არჩევნების წინ, ერთი თვით ადრე აპირებთ, გასაკვირი არც იქნება, რომ საზოგადოების მხრდაჭერის მოლოდინი გაგიცრუვდეთ. ამდენი წელი ინახავთ ინფორმაციას და ამომრჩეველს თქვენთვის სასურველ დროს გამომზეურებას პირდებით?

-სწორედაც არჩევნების წინ ვაპირებ. რომ ვთქვა, ხელისუფლება 2012 წლის 1-ელ ოქტომბრამდე ხალს სცემდა და ჟურნალისტებს ავიწროვებდა-მეთქი, სიმართლეა და ახლა რომ ვთქვა, სადღაც მუნიციპალიტეტში „ნაციონალი“ „ოცნების“ სახელით ოპერირებს, ამიტომ ხმას არ მომცემენ? მე არაფერს არ ვინახავ, ამას „ქართული ოცნების“ ლიდრები ინახავენ. ახლა დავიწყე მოძიება და უკვე მაქვს მასალები ვინ სად მუშაობს, ვინ სად რას მიჰქარავს, ძალიან დიდი სამუშაოა, ახლა დახარისხების პროცესში ვარ, რომელსაც აუცილებლად გამოვაქვეყნებ. ჩემი პოლიტიკის შემადგენლია, რომ ხალხმა გაიგოს - „ქართული ოცნება“ სინამდვილეში ელფერშეცვლილი „ნაციონალური მოძრაობაა.“

„პრაიმნიუსჯორჯია“ , ხათუნა ხატიაშვილი