ალეკო ელისაშვილს პატიმრობა შეეფარდა

ტერორისტული აქტის ჩადენის მცდელობის ბრალდებით დაკავებულ პოლიტიკოსს, „ლელო - ძლიერი საქართველოს“ ერთ-ერთ ლიდერს, ალეკო ელისაშვილს აღკვეთის ღონისძიების სახით პატიმრობა შეეფარდა.

აღნიშნული გადაწყვეტილება თბილისის საქალაქო სასამართლოს მოსამართლე ლელა მარიდაშვილმა მიიღო.

საქმეზე წინასასამართლო სხდომა 22 იანვარს 14:00 საათზე ჩაინიშნა. 

 აღკვეთის ღონისძიების შეფარდების შუამდგომლობით სასამართლოს ბრალდების მხარემ მიმართა.

"არსებობს ახალი დანაშაულის ჩადენის საფრთხე, ადვოკატსაც უთხრა, რომ მარტო იმას ნანობს, რომ განზრახვა სისრულეში ვერ მოიყვანა. ასევე სხვა მოქმედი საქმეცაა მასზე. მოწმებებზე ზემოქმედების საფრთხეცაა და მიმალვისაც" - განაცხადა პროკურორმა, მარიამ ბერძენიშვილმა. 

პროკურორის თქმით, ელისაშვილი "წინასწარ შემუშავებული გეგმით მოქმედებდა". რაც შეეხება აალებადი ნივთიერების გამოყენებას, ბრალდების მხარის განცხადებით, აღნიშნული ქიმიური ექსპერტიზის დასკვნით დადასტურდა.

დაცვის მხარე ბრალდების შუამდგომლობას არ დაეთანხმა, ადვოკატის განცხადებით, ელისაშვილს ტერორისტული აქტის ჩადენის მცდელობა არ ჰქონია. ადვოკატმა ელისაშვილის 5 000-ლარიანი გირაოს სანაცვლოდ გათავისუფლება მოითხოვა.

"მან განზრახ აირჩია შაბათი დილა, იმ მოტივით, რომ შიგნით არავინ ყოფილიყო და დაზიანებულიყო, რაც ზიანის მიყენების განზრახვას ეწინააღმდეგება, რაც ერთ-ერთი მთავარია ტერორიზმის დროს". - განაცხადა ადვოკატმა გიორგი რეხვიაშვილმა. 

ალეკო ელისაშვილმა დარბაზი შემდეგი სიტყვებით დატოვა: „ცეცხლი უსამართლობას“.