რამაზ ბოლქვაძე: ბათუმს აუცილებლად ექნება ახალი სტადიონი

”ბათუმის სტადიონის პროექტს ჩემთვის, როგორც მინისტრისთვის ძალიან პრინციპული დატვირთვა აქვს და მე ყველაფერს გავაკეთებ პროექტის განხორციელებისთვის.
ჩვენ საზოგადოებას ბათუმის საერთაშორისო საფეხბურთო სტადიონის პროექტის განხორციელების პირობა მივეცით და მე ამ პროცესს აუცილებლად ბოლომდე მივიყვან. ქალაქს მალე ღირსეული საფეხბურთო სტადიონი ექნება“ - განაცხადა აჭარის ფინანსთა და ეკონომიკის მინისტრმა რამაზ ბოლქვაძემ სტადიონის პროექტთან დაკავშირებით გამართულ სამუშაო შეხვედრაზე.
მინისტრი ბათუმის საფეხბურთო სტადიონის პროექტის მიმდინარეობის პროცესს გაეცნო. რამაზ ბოლქვაძეს დეტალური ინფორმაცია შპს „სტადიონის“ დირექტორმა გიორგი ზირაქაშვილმა მიაწოდა. აჭარის ფინანსთა და ეკონომიკის მინისტრმა პროექტში ჩართულ თითოეულ თანამშრომელს ახალი დავალებები მისცა და სამუშაო პროცესის კიდევ უფრო გააქტიურებისკენ მოუწოდა.
„ძალიან კარგად ვხედავ, რომ სტადიონის მშენებლობას უამრავი სპორტსმენი, ფეხბურთის გულშემატკივარი, თუ ჩვენი უბრალო თანაქალაქელი დიდი ინტერესით ელოდება და მათი ეს სურვილი მინისტრის რანგში ჩემს მიერ მოსახლეობასთან გამართულ ყველა შეხვედრისას იკვეთება.
დღეს კიდევ ერთხელ დეტალურად გავეცანი პროექტის მიმდინარეობის პროცესს და მინდა აღვნიშნო,რომ სამუშაოები ამ კუთხით ძალიან აქტიურად მიმდინარეობს. პროექტი მოწონებულია საქართველოს ფეხბურთის ფედერაციისა და ტექნიკური და სამშენებლო ნებართვების სააგენტოს მიერ. შემდგომი ეტაპი საზედამხედველო კომპანიის შერჩევის მიზნით ელექტრონულ ტენდერს მოიცავს,რის შემდეგაც უკვე სტადიონის მშენებლობის ტენდერის გამოცხადების პროცედურები დაიწყება.