NDI - 39 % მიიჩნევს, რომ ქვეყანა არასწორი მიმართულებით ვითარდება

NDI-მ დღეს სოციოლოგიური კვლევის მორიგი შედეგები გამოაქვეყნა. გამოკითხვის მიხედვით, კითხვაზე - როგორი მიმართულებით ვითარდება ქვეყანა, შედეგები ასე გადანაწილდა : სწორი მიმართულებით ვითარდება -20 პროცენტი, არასწორი მიმართულებით - 39 პროცენტი, არ იცვლება - 36 პროცენტი.

აღსანიშნავია, რომ NDI-ის კვლევებით, 2009 წელს გამოკითხულთა 40-50% ფიქრობდა, რომ საქართველო სწორი მიმართულებით ვითარდებოდა, 2010 წელს - 50-53%, 2011 წელს - 36-60%, 2012 წელს - 55-60%. 2013 წელს ეს მაჩვენებელი 40-55%-ს შორის მერყეობდა, 2014 წელს გამოკითხულთა 40% ფიქრობდა, რომ საქართველო სწორი მიმართულებით ვითარდება, ხოლო 2015 წელს ასე მხოლოდ კვლევაში მონაწილეთა 25% მიიჩნევდა.

საველე სამუშაოები ჩატარდა 23 თებერვალი-14 მარტის პერიოდში, საქართველოს მასშტაბით, 3,900 პირისპირ ინტერვიუს წარმომადგელობითი შერჩევის საფუძველზე.

კვლევის პოლიტიკურ ნაწილსაც NDI  მიმდინარე კვირაში გამოაქვეყნებს.