დონალდ ტრამპს ირანის წინააღმდეგ სამხედრო მოქმედებების ვარიანტები წარუდგინეს - ABC News

აშშ-ის საზღვაო ძალების ადმირალმა ბრედ კუპერმა, რომელიც აშშ-ის ცენტრალური სარდლობის მეთაურის რანგში ახლო აღმოსავლეთში ძალებს მეთაურობს, პრეზიდენტ დონალდ ტრამპს ირანში შესაძლო სამხედრო ვარიანტების შესახებ ინფორმაცია მიაწოდა. ამის შესახებ ABC News წყაროებზე დაყრდნობით იუწყება.

გამოცემა აღნიშნავს, რომ მსჯელობას ასევე ესწრებოდა გაერთიანებული შტაბების ხელმძღვანელი და ტრამპის მთავარი სამხედრო მრჩეველი, გენერალი დენ კეინი.

რეგიონის უმაღლესი სამხედრო მეთაურების შეხვედრა იმავე დღეს გაიმართა, როდესაც აშშ-სა და ირანის ოფიციალურმა პირებმა ჟენევაში ირანის ბირთვულ პროგრამასა და ბალისტიკურ რაკეტებზე არაპირდაპირი მოლაპარაკებები გამართეს.

არცერთ მხარეს არ გამოუცხადებია შეთანხმების შესახებ. ირანის საგარეო საქმეთა მინისტრმა განაცხადა, რომ პროგრესი მიღწეულია და რომ „ტექნიკური მოლაპარაკებები“ მომავალ კვირას ვენაში გაგრძელდება.

ABC News-ის ცნობით, ბოლო დღეებში რამდენიმე რესპუბლიკელმა და ტრამპის ადმინისტრაციის ზოგიერთმა წარმომადგენელმა პირადად განაცხადა, რომ ისრაელმა უნდა აიღოს ინიციატივა ირანზე დარტყმასთან დაკავშირებით და რომ შეერთებულმა შტატებემა არ უნდა დაიწყოს სამხედრო მოქმედებები.

„მაშინვე არ იყო ნათელი, დაუჭერდა თუ არა მხარს ტრამპი ასეთ გეგმას, რომელიც, როგორც ამბობენ, სულ უფრო მეტად იმედგაცრუებულია ირანის უარით, დაეთანხმოს მის მოთხოვნებს ურანის გამდიდრების შეჩერებისა და ბალისტიკური რაკეტების პროგრამის შეზღუდვის შესახებ,“ - აღნიშნავს გამოცემა.

ABC News-ის წყაროების ცნობით, აშშ-ისრაელის ერთობლივი ოპერაცია კვლავ შესაძლებელია, რადგან აშშ-მა რეგიონში შთამბეჭდავი რაოდენობის გემები და გამანადგურებლები განალაგა.

პოლიტიკური ანალიტიკოსები მიიჩნევენ, რომ ვარაუდები იმის შესახებ, რომ ისრაელი პირველ „დარტყმას“ განახორციელებს, სავარაუდოდ, კონგრესში რესპუბლიკელებისთვის პოლიტიკური საფარველის ფუნქციას ასრულებს, რომლებსაც რთული საარჩევნო წელი ელის.

ტრამპი საარჩევნო კამპანიას იმ დაპირებით აწარმოებდა, რომ ომებს დაასრულებდა და არა დაიწყებდა. თუ ისრაელი ირანს თავს დაესხმება, აშშ-ის ომის დეპარატმენტის წარმომადგენლები ვარაუდობენ, რომ ირანი უპასუხებს. ანალიტიკოსების თქმით, ამის შემდეგ ტრამპს შეეძლება ამტკიცოს, რომ კონფლიქტში აშშ-ის ჩარევა შეესაბამება ისრაელის დაცვის დიდი ხნის პოლიტიკას.