ჩვენ უდიდეს რუსულ ნავთობკომპანიებს დავარტყით, დასასანქცირებელი თითქმის არაფერი დარჩა - მარკო რუბიო

აშშ-ის სახელმწიფო მდივანმა, მარკო რუბიომ, განაცხადა, რომ ვაშინგტონმა თითქმის მიაღწია რუსეთის წინააღმდეგ ახალი სანქციების დაწესების ზღვარს. მისივე თქმით, შეზღუდვები უკვე დაწესდა მსხვილი ნავთობკომპანიებისთვის, შემდეგი ნაბიჯები კი, სავარაუდოდ, უფრო არსებული სანქციების აღსრულებას გულისხმობს, ვიდრე ახლის დაწესებას.

ამის შესახებ რუბიომ კანადაში G7-ის საგარეო საქმეთა მინისტრების შეხვედრის შემდეგ ჟურნალისტებს განუცხადა.

მოსკოვზე სანქციების ზეწოლის გაზრდის შესახებ რეპორტიორის კითხვაზე პასუხის გაცემისას, რუბიომ განაცხადა, რომ „თითქმის არაფერი დარჩა, რისი სანქცირებაც შეგვიძლია“.

„ჩვენ მათ უდიდეს ნავთობკომპანიებს დავარტყით, ეს სწორედ ის იყო, რასაც ყველა ითხოვდა“, - თქვა რუბიომ.

სახელმწიფო მდივანი ასევე შეეხო ე.წ. „ჩრდილოვანი ფლოტის“ საკითხს, რომელსაც რუსეთი ნავთობის შეზღუდვებისთვის გვერდის ავლისთვის იყენებს.

რუბიომ მის წინააღმდეგ ბრძოლა შეაფასა, როგორც „სანქციების განხორციელების უზრუნველყოფის მექანიზმი“ და არა როგორც ახლის დაწესების საბაბი.

რუბიომ გამოთქვა მოსაზრება, რომ ევროპელმა პარტნიორებმა ამ პროცესში უფრო აქტიური როლი უნდა შეასრულონ, რადგან გემების მნიშვნელოვანი ნაწილი მათ ტერიტორიებთან უფრო ახლოს გადის.

შეკითხვაზე, ნამდვილად ისწრაფვის თუ არა რუსეთი მშვიდობისკენ, რუბიომ უპასუხა, რომ ამაზე მსჯელობა მხოლოდ მისი ქმედებების შეფასებით უნდა შეიძლება .

მისი აზრით, მოსკოვმა „ნათლად განაცხადა, რა სურს – მათ დონეცკის ოლქის დანარჩენი ნაწილი სურთ და ასეთი მოთხოვნები უკრაინული მხარისთვის მიუღებელია“.

რუბიომ ასევე კომენტარი გააკეთა უკრაინის ტერიტორიაზე განხორციელებულ ინტენსიურ სარაკეტო დარტყმებზე, რომლებიც, მისი თქმით, ელექტროქსელის განადგურებასა და მოსახლეობის დემორალიზაციას ისახავს მიზნად.

უკრაინის მხარდაჭერის კონტექსტში, სახელმწიფო მდივანმა დაადასტურა, რომ შეერთებული შტატები უკრაინულ მხარესთან მიმდინარე მოლაპარაკებებს აწარმოებს ენერგოსისტემის სტაბილიზაციაში დახმარების შესახებ.

მან ხაზი გაუსვა, რომ უკრაინის ენერგოსისტემის მდგომარეობა ყოველწლიურად უარესდება. რუბიოს თქმით, განიხილება როგორც სპეციალიზებული აღჭურვილობის, ასევე თავდაცვითი იარაღის მიწოდება ენერგეტიკული ობიექტების დასაცავად.

თუმცა, მთავარ პრობლემად რჩება აღჭურვილობის დამონტაჟებიდან მალევე განადგურების მაღალი რისკი.

„თუ ეს აღჭურვილობა დამონტაჟებიდან ერთი კვირის შემდეგ განადგურდება, ეს პრობლემად რჩება. და ასე იყო ეს ბოლო ორი ან სამი წლის განმავლობაში“, - თქვა რუბიომ.