იტალიის პოლიციამ 55 ქართველი დააკავა

საქართველო, თბილისი - 09:40 | 10.02.2021

ნანახია: 1028

იტალიის პოლიციამ 55 ქართველი დააკავა. რამდენიმე რეგიონსა და ქვეყნის ფარგლებს გარეთ ჩატარებული მასშტაბური სპეცოპერაციის შედეგად, ქართველებისა და უკრაინელების ორი დაჯგუფება გამოავლინეს. ინფორმაციას იტალიური მედია ავრცელებს.

დაკავებულია 62 პირი, მათი უმრავლესობა ქართველია.

გამოძიების ცნობით, დაჯგუფებების წევრები ჩრდილოეთ იტალიაში საცხოვრებელი ბინების გატეხვასა და ფულის გათეთრებაში არიან ეჭვმიტანილები.

იტალიური მედია წერს, რომ კრიმინალური დაჯგუფება ძირითადად ქალაქ რეჯო-ემილიაში მოქმედებდა. ისინი ბინებს "ქართული მეთოდით" ქურდავდნენ და კარის საკეტებს სპეციალური ხელსაწყოების დახმარებით კვალის დატოვების გარეშე ტეხდნენ.

ოპერაცია, რომელშიც რეჯო-ემილიის რეგიონული პოლიციის 100-ზე მეტი თანამშრომელი მონაწილეობდა, იტალიის ცენტრალურ ოპერატიულ სამსახურსა და პოლიციის საერთაშორისო თანამშრომლობის სამსახურთან თანამშრომლობით ჩატარდა.

საგამოძიებო მოქმედებები სამი წლის განმავლობაში ხორციელდებოდა.