ბერლინში, საქართველოს მოქალაქის მკვლელობასთან რუსეთს კავშირი არ აქვს - დიმიტრი პესკოვი

ბერლინში საქართველოს მოქალაქის ზელიმხან ხანგოშვილი მკვლელობას რუსეთის სახელმწიფოსა და ოფიციალურ ორგანოებთან კავშირი არ აქვს. ამის შესახებ რუსეთის პრეზიდენტის პრეს მდივანმა დიმიტრი პესკოვმა ჟურნალისტებს განუცხადა.

პანკისის მკვიდრი 40 წლის ზელიმხან ხანგოშვილი 23 აგვისტოს ბერლინში მოკლეს. ის პარასკევის ლოცვაზე მეჩეთში მიდიოდა, რა დროსაც მას ველოსიპედით გამვლელმა თავში ესროლა. ხანგოშვილი ადგილზე დაიღუპა. დაკავებულია მკვლელობაში ეჭვმიტანილი რუსეთის 49 წლის მოქალაქე. ბერლინის პროკურატურის ცნობით, ამოღებულია მკვლელობის იარაღი და ველოსიპედი, რომლითაც ეჭვმიტანილი მიიმალა.

 „ამ საქმეს, ბუნებრივია კავშირი არ აქვს რუსეთის სახელმწიფოსთან და ოფიციალურ ორგანოებთან. არ ვიცი, უმჯობესია საგარეო საქმეთა სამინისტროში დაინტერესდეთ, ვინ იყო იქ რუსეთის მოქალაქე, იყო თუ არა ის ნამდვილად რუსეთის მოქალაქე. მაგრამ მე დარწმუნებით ვუარყოფ ამ მკვლელობის რაიმე კავშირს ოფიციალურ რუსეთთან“, - განაცხადა პესკოვმა.

ზელიმხან ხანგოშვილმა საქართველო ორი წლის წინ დატოვა, მას შემდეგ, რაც 2015 წლის 28 მაისს, თბილისის ცენტრში, მირზა გელოვანის ქუჩაზე მძიმედ დაჭრეს. ხანგოშვილს მაშინ ოთხი ტყვია მოხვდა, მაგრამ გადარჩა. 

უსაფრთხოების მიზნით ზელიმხან ხანგოშვილი ჯერ უკრაინაში გაემგზავრა, მოგვიანებით კი გერმანიაში გადავიდა და ბერლინში ცხოვრობდა.

ზელიმხან ხანგოშვილი რუსეთ-ჩეჩნეთის ომის მონაწილეა. ის ერთ-ერთი საველე მეთაური იყო, რის გამოც მოსკოვს მასზე ძებნა ჰქონდა გამოცხადებული. ხანგოშვილი წლების განმავლობაში საქართველოში ცხოვრობდა თორნიკე ქავთარაშვილის სახელითა და გვარით. იგი შინაგან საქმეთა სამინისტროსთან თანამშრომლობდა. მისი მეტსახელია „ზელო დიშნი“.

ზელიმხან ხანგოშვილი ფიგურირებდა ლაფანყურის სპეცოპერაციაშიც. მისი განცხადებით, ის და ახმედ ჩატაევი უკანონო შეიარაღებულ ჯგუფთან მოსალაპარაკებლად საქართველოს შს სამინისტროს წარმომადგენლებმა გააგზავნეს. ის ამბობდა, რომ ახმედ ჩატაევი ლოპოტის ხეობაში მოლაპარაკების პროცესში მონაწილეობის მისაღებად, უშუალოდ მისი თხოვნით ჩავიდა.