სალომე ზურაბიშვილი ჟენევაში შრომის საერთაშორისო ორგანიზაციის 108-ე კონფერენციაში მიიღებს მონაწილეობას

საქართველოს პრეზიდენტი სალომე ზურაბიშვილი 10 ივნისს სამუშაო ვიზიტით შვეიცარიის კონფედერაციაში გაემგზავრება და ჟენევაში შრომის საერთაშორისო ორგანიზაციის 108-ე კონფერენციაში მიიღებს მონაწილეობას, რომელიც ორგანიზაციის 100 წლისთავს ეძღვნება. ინფორმაციას პრეზიდენტის ადმინისტრაცია ავრცელებს.

შვეიცარიის კონფედერაციაში საქართველოს საგანგებო და სრულუფლებიანი ელჩის, დავით ჯალაღანიას განცხადებით, კონფერენცია, რომელშიც საქართველოს პრეზიდენტი მონაწილეობს ორგანიზაციის 100 წლისთავს ეძღვნება, ამიტომ ორგანიზაციის ლიდერებმა ძალისხმევა არ დაიშურეს, რომ კონფერენციაში მონაწილეობა მიეღო მაღალი რანგის სტუმრებს - კონფერენციას ესწრება 40 ქვეყნის ლიდერი და 190- მდე ქვეყნის 5000 დელეგატი.

"საქართველოს პრეზიდენტი მისასალმებებელი სიტყვით მიმართავს კონფერენციის დელეგატებს და საქართველოს რეფორმებზე, მიღწევებზე, გამოწვევებზე და ჩვენი ქვეყნის შრომის კანონმდებლობის, თუ დასაქმების მიმართულებით არსებულ თანამედროვე პრობლემატიკაზე ისაუბრებს", - აღნიშნა დავით ჯალაღანიამ.

მისი თქმით, პრეზიდენტი შეხვედრებს გამართავს ჟენევაში განლაგებული საერთაშორისო ორგანიზაციების წარმომადგენლებთან და გამომდინარე ღონისძიების ფორმატიდან კოლეგებთან შეხვედრები იქნება, როგორც პროტოკოლური, ასევე არაფორმალური.

რეფორმები, მიღწევები, გამოწვევები და საქართველოს შრომის კანონმდებლობა - ეს იმ საკითხების მოკლე ჩამონათვალია, რომელზეც საქართველოს პრეზიდენტი ჟენევაში, 11 ივნისს შრომის საერთაშორისო ორგანიზაციის კონფერეციაზე გამოსვლისას გაამახვილებს ყურადღებას.