სალომე სამადაშვილს მინდა ვკითხო, ბოლოს როდის დაესიზმრა ივანიშვილი, და როდის შეაშინა - ნუკრი ქანთარია

„ქართული ოცნების“ წევრი, დეპუტატი ნუკრი ქანთარია დავით გარეჯთან დაკავშირებით ოპოზიციის მიერ გაკეთებულ განცხადებებს ეხმიანება და აღნიშნავს, რომ აღვირახსნილობასაც საზღვარი აქვს . მისი თქმით, საზოგადოება უკვე მიეჩვია, რომ ოპონენტები ყველაფერს ბიძინა ივანიშვილს აბრალებენ. თუმცა ნუკრი ქანთარიას აზრით, ახლა გაიგეს, რომ თურმე დავით გარეჯის საკითხშიც „ქართული ოცნების“ თავმჯდომარე მონაწილეობდა.

ქანთარია „ნაციონალური მოძრაობის“ წევრის, სალომე სამადაშვილის იმ განცხადებას ეხმიანება, სადაც ოპოზიციის წევრმა დეპუტატებისგან მოითხოვა, დაიბარონ პარლამენტში ივანიშვილი, მან კი ისაუბროს იმ ინტერესებზე, რომელიც აზერბაიჯანთან და გაზთან დაკავშირებით აქვს.

„კარგად ვიცით ეს ყველამ უკვე, რომ სეტყვა რომ მოდის, ეს ბიძინა ივანიშვილის ბრალია. მას ღილაკი აქვს, დააჭერს ამ ღილაკს და მოდის სეტყვა, მაგრამ ახლა დავით გარეჯთან დაკავშირებითაც თუ მისი მონაწილეობა ყოფილა თურმე თავიდანვე, ეს ახლა გავიგეთ, ქალბატონი სამადაშვილის მხრიდან. მინდა, ვკითხო, იქნებ გულწრფელად მითხრას, ბოლოს როდის დაესიზმრა ეს კაცი, როდის შეაშინა და რა უთხრა,“ - განაცხადა ნუკრი ქანთარიამ.