პოლონეთში, ქალაქის მერი კონცერტის დროს დანით დაჭრეს

საქველმოქმედო ღონისძიების დროს ქალაქ გდანსკის მერი პაველ ადამოვიჩი დანით დაჭრეს.

თავდამსხმელი სცენაზე აიჭრა და ყვირილი დაიწყო, რომ მან პატიმრობის ვადა უკანონოდ მოიხადა.

არეულობის შედეგად მან ადამოვიჩს დანით დარტყმა ორჯერ - მუცლისა და გულის არეში მიაყენა. მერი საავადმყოფოში გადაიყვანეს. მას ოპერაცია გაუკეთდა, თუმცა ადამოვიჩის მდგომარეობა მძიმეა. ექიმების თქმით, პაციენტის ბედს შემდგომი საათები გადაწყვეტს. ექიმებმა მოსახლეობას სისხლის ჩაბარებისკენაც მოუწოდეს.

დაცვამ თავდამსხმელი დააკავა და პოლიციას გადასცა.

ღონისძიება, რომელსაც მერი ესწრებოდა, დახურული იყო. მედიის ცნობით, თავდამსხმელმა საღამოზე დასწრება პრეს-ბარათით მოახერხა.

ხელისუფლების განცხადებით, თავდასხმის მოტივები ჯერ უცნობია. თავდამსხმელი 27 წლისაა. ის 2013 წელს ოთხი ბანკის ძარცვისთვის დააკავეს და 5 წლითა და 5 თვით პატიმრობა მიუსაჯეს. როგორც მან გამომძიებლებს განუცხადა, ციხეში მას სასტიკად ექცეოდნენ და აწამებდნენ.

პაველ ადამოვიჩი 53 წლისაა, ის გდანსკის მერი 1998 წელს გახდა.