ამერიკელ სამხედროებს მექსიკის საზღვართან მიგრანტების წინააღმდეგ იარაღის გამოყენების უფლება მისცეს

თეთრი სახლის აპარატის უფროსმა ჯონ კელიმ ხელი მოაწერა მემორანდუმს, რომელიც მექსიკის საზღვართან განთავსებულ ამერიკელ სამხედროებს, აუცილებლობის შემთხვევაში ცეცხლსასროლი იარაღის გამოყენების უფლებას აძლევს.

მანამდე აშშ-ის თავდაცვის სამინისტრომ განაცხადა, რომ საზღვარზე 7 ათასამდე სამხედროს გაგზავნას აპირებდა. პრეზიდენტმა დონალდ ტრამპმა აღნიშნა, რომ საზღვარზე 15 ათასამდე სამხედრო მოსამსახურე გაიგზავნებოდა. ამის გარდა, საზღვარზე აშშ-ის ეროვნული გვარდიის  2 100 სამხედრო უკვე იმყოფება.

აღნიშნული ზომები ხელისუფლებამ აშშ-ის საზვრებთან მიგრანტების უზარმაზარი ნაკადის მიახლოების გამო მიიღო. აშშ-სკენ ცენტრალური ამერიკის ქვეყნებიდან რამდენიმე ათასი ადამიანი მიემართება.

მექსიკის შსს-ს ბოლო მონაცემებით,  აშშ-ის საზღვართან, ქალაქების  ტიხუანისა და მეხიკალის რაიონებში 5 600 ჰონდურასელი, გვატემალელი და სალვადორელი მიგრანტი იმყოფება. არსებული ინფორმაციით, მიგრანტების ნაწილი უკან სამშობლოში დაბრუნდა ან მექსიკაში დარჩა.