ჩემს ტელეფონზე ზაზა სარალიძის მიერ მუქარის შემცველი ტექსტები შემოვიდა - ზვიად ფხაკაძე

გუშინ, როდესაც კომისიას ვაძლევდი ახსნა-განმარტებას, ჩემს კუთვნილ მობილურ ტელეფონზე შემოვიდა მუქარის შემცველი ტექსტები, რაც უკავშირდებოდა აშკარად ჩემს საპროკურორო საქმიანობას, - ამის შესახებ ხორავას ქუჩაზე მკვლელობის საქმის პროკურორმა ზვიად ფხაკაძემ მოზარდების მკვლელობის საქმეზე შექმნილ დროებით საგამოძიებო კომისიის სხდომაზე განაცხადა.

მისი თქმით, ეს მუქარა ხდებოდა აშკარად ზაზა სარალიძის მიერ.

„გუშინ, როდესაც კომისიას ვაძლევდი ახსნა-განმარტებას, ჩემს კუთვნილ მობილურ ტელეფონზე შემოვიდა მუქარის შემცველი ტექსტები, რაც უკავშირდებოდა აშკარად ჩემს საპროკურორო საქმიანობას. ასევე, კავშირში იყო იმ ახსნა-განმარტების შინაარსთან, რომელსაც მე კომისიას ვაძლევდი.

აღნიშნულთან დაკავშირებით მივმართე შესაბამისი მოხსენებითი ბარათით კომპეტენტურ პირს და მოხდება სათანადო რეაგირება. ცნობისთვის მინდა იცოდეთ ეს და ის, რომ ჩემს მიერ ახსნა-განმარტების მიცემის პროცესი ხორციელდებოდა გარკვეული პირების მხრიდან კონკრეტული მუქარის შემცველი ტექსტების ქვეშ“, – განაცხადა ფხაკაძემ.

მისი განცხადებით, კომისიის წევრების მხრიდან შინაარსობრივი მხარით დაინტერესების შემთხვევაში,  მზად არის, ტექსტები კომისიის წევრებს აჩვენოს, ასევე იქიდან გამომდინარე, რომ გზავნილი პირად შეურაცხმყოფელ შინაარსსაც მოიცავს, ფხაკაძე ამბობს, რომ მას დახურულ სხდომაზე წარადგენს.