ამერიკელი პროფესორი ჯიმ რიდლი რეგისტრაციის ქართულ მოდელს გაეცნო

იუსტიციის სამინისტროს საჯარო რეესტრის ეროვნულ სააგენტოს ამერიკელი პროფესორი ჯიმ რიდლი სტუმრობდა. ვიზიტის მიზანი კერძო საკუთრებისა და უძრავი ქონების კუთხით საქართველოში არსებული სიტუაციის შეფასება და სასოფლო-სამეურნეო დანიშნულების მიწებთან დაკავშირებული საინვესტიციო გარემოს ანალიზი იყო.

ჯიმ რიდლი მიწის რეგისტრაცისი სისტემის, კადასტრის, გეოდეზიისა და კარტოგრაფიის საკითხებითაც დაინტერესდა. საჯარო რეესტრის წარმომადგენლებმა მას გეოინფორმაციული სისტემის, საკადასტრო მონაცემებისა და ელექტრონული რუკების დამუშავების ქართული მოდელიც გააცნეს.

ამერიკელი პროფესორი საქართველოში ფრიდრიხ ნაუმანის ფონდის მოწვევით იმყოფება. იგი მრავალი წლის განმავლობაში ვისკონსინის უნივერსიტეტში მუშაობდა, არის ამავე უნივერსიტეტის მიწის პოლიტიკის კვლევისა და სასწავლო საერთაშორისო ცენტრის წევრი. ჯიმ რიდლი  მრავალი სამეცნიერო ნაშრომის ავტორია, აქვს სხვადასხვა ქვეყანასა(კამბოჯა, ახალი ზელანდია, ფილიპინები, ჩინეთი) და საერთაშორისო პროექტში(UN, GIZ, WB) მიწის რეგისტრაციისა და კადასტრის ექსპერტად მუშაობის დიდი გამოცდილება.