"თავისუფალი დემოკრატები" საგანგებო განცხადებას ავრცელებენ

"თავისუფალმა დემოკრატებმა" კორცხელში განვითარებული მოვლენების შესახებ განცხადება გაავრცელეს:

„თავისუფალი დემოკრატები პრინციპულად ვგმობთ კორცხელში მომხდარ ძალადობას, რადგან ეს არის ადამიანის უფლების ხელყოფა; ეს ქმედებები დღეს ჩვენთვის ისევე მიუღებელია, როგორც წინა ხელისუფლების დროს განხორციელებული ძალადობა. ამასთანავე, ეს არის პოლიტიკური ოპონენტების წინააღმდეგ ჩადენილი ფიზიკური და მორალური ძალმომრეობა.

"მომხდარი კატასტროფულად აზიანებს ზოგადად ქვეყნის დემოკრატიულობას და კერძოდ, საარჩევნო პროცესის ობიექტურად, სამართლიანად წარმართვის შესაძლებლობასა და პერსპექტივას. ამგვარი დანაშაულებრივი ქმედება უშუალოდ ზღუდავს ამომრჩევლის თავისუფლებას, რადგან უკიდურესად უარყოფითად ზემოქმედებს მის უფლებაზე, გააკეთოს დამოუკიდებელი არჩევანი.

"მოვუწოდებთ სამართალდამცავებს, დაუყოვნებლივ დაიწყონ გამოძიება, რათა გამოვლინდეს და უმკაცრესად დაისაჯოს მომხდარი დანაშაულის ყველა დამკვეთი, წამქეზებელი და უშუალო შემსრულებელი,“- ნათქვამია განცხადებაში.