თამაზ მეჭიაური: მაჟორიტარული არჩევნების გაუქმება ჩვენი ქვეყნისთვის დამაზიანებელი იქნება

დეპუტატი თამაზ მეჭიაური მიიჩნევს, რომ მაჟორიტარული არჩევნების გაუქმება ქვეყნისთვის დამაზიანებელი იქნება. მისი თქმით,  მაჟორიტარული სისტემის გაუქმების შემთხვევაში, რეგიონების უმრავლესობა დარჩება დეპუტაციის გარეშე. დეპუტატი ასევე აცხადებს, რომ საკონსტიტუციო ცვლილებები არჩევნებამდე ვერ მოესწრება.

„ოპოზიცია იმიტომ არის ოპოზიცია, რომ უმრავლესობას არ ფლობს. გამომდინარე აქედან, ულტიმატუმით საუბარი არ მიმაჩნია სწორად. იმისთვის რომ კანონმდებლობა და კონსტიტუცია შეცვალო, უნდა მოხვიდე ხელისუფლებაში იმ დოზით მაინც, რომ რეალობასთან ახლოს იყოს შენი პრეტენზიები. გამომდინარე აქედან, მე მივესალმები ყველა იმ ცვლილებას, რაც არჩევნებს დემოკრატიულად ჩაატარებს. ერთადერთი რაზეც მე განსხვავებული აზრი მაქვს, არის ის, რომ მაჟორიტარული არჩევნების გაუქმება ეს იქნება დამაზიანებელი ჩვენი ქვეყნისთვის. ყველაფერი ეს გამოიწვევს იმას, რომ მთელი პოლიტიკური ცენტრი განთავსდება თბილისში და მანდატების უმრავლესობა დარჩება თბილისში, ხოლო რეგიონების უმრავლესობა დარჩება დეპუტაციის გარეშე”, - განაცხადა მეჭიაურმა.