მოსამართლემ გიგი უგულავას სახაზინო ადვოკატის შუამდგომლობა არ დააკმაყოფილა

საქალაქო სასამართლოში გიგი უგულავას და დავით კეზერაშვილის წინააღმდეგ რიყისა და ტელეიმედის გასხვისების საქმეზე პროცესი იმართება.

საქმე სახაზინო ადვოკატმა გადაიბარა, რომელმაც პროცესის გადადების შუამდგომლობა დააყენა. გიგი უგულავას სახაზინო ადვოკატი დასკვნითი სიტყვის მოსამზადებლად 2 კვირიან ვადას ითხოვდა, თუმცა მოსამართლემ ეს შუამდგომლობა არ დააკმაყოფილა. მოსამართლემ მას მისცა 3 საათი, რათა გიგი უგულავას ეპიზოდზე დასკვნითი სიტყვა მოამზადოს.

მოსამართლემ განმარტა, რომ ის უგულავას კერძო ადვოკატისგან, გიორგი კონდახიშვილისგან, დღეს ელოდებოდა დასკვნითი სიტყვის წარდგენას.

გიორგი კონდახიშვილი პროტესტის ნიშნად პოცესზე არ გამოცხადდა. მან საქმიდან აცილებაც კი მოითხოვა, ვინაიდან წინა პროცესზე გამოუცხადებლობის გამო, მოსამართლემ დააჯარიმა, რის შემდეგ სახაზინო ადვოკატს დაევალა დასკვნითი სიტყვის მომზადება.