გიორგი კვირიკაშვილი: ბიძინა ივანიშვილმა ძალიან ბევრი გააკეთა ქართულ პოლიტიკაში და ვფიქრობ, კიდევ არაერთ სასიკეთოს გააკეთებს

ბიძინა ივანიშვილმა ძალიან ბევრი გააკეთა ქართულ პოლიტიკაში და ვფიქრობ, კიდევ არაერთ სასიკეთოს გააკეთებს. -ამის შესახებ საქართველოს პრემიერ-მინისტრმა, გიორგი კვირიკაშვილმა ჟურნალისტებთან შეხვედრაზე განაცხადა.

”რაც შეეხება ჩემს მასთან ურთიერთობას, მე ყოველთვის მქონდა მასთან ღია, გულწრფელი ურთიერთობა.არასდროს ვერიდებოდი მასთან დებატებს და არაერთ საკითხზე მქონია ძალიან მწავავე კამათი - მისი მხრიდანაც არასდროს ყოფილა ეს უარყოფითად მიღებული”, - განაცხადა პრემიერმა.
მან ასევე აღნიშნა,  რომ ივანიშვილის ინიციატივა იყო მისი კანდიდატურის წარდგენა პრემიერის პოსტზე.
”არასოდეს არ დამიმალავს მასთან ჩემი აზრი, არც ერთ პრინციპულ საკითხთან მიმართებაში არ გამიკეთებია კომპრომისი იმ კუთხით, რომ არ მეთქვა სიმართლე.  რაც შეეხება მის ჩართულობას ქართულ პოლიტიკურ მომავალში და წინასაარჩევნო პროცესში, ეს მხოლოდ და მხოლოდ დადებითი იქნება. ის გახლავთ ”ქართული ოცნების” დამფუძნებელი და მას აქვს მორალური უფლება, რომ საკუთარი მოსაზრებები და მხარდაჭრა გამოთქვას. ამას მე მგონი ვერავინ აუკრძალავს”, - განაცხადა კვირიკაშვილმა.