პრეზიდენტის განკარგულებები არჩევნების დანიშვნის შესახებ ძალაში 8 აგვისტოს შევა

საქართველო, თბილისი - 14:00 | 06.04.2016

ნანახია: 1852

არჩევნების დანიშვნის შესახებ საქართველოს პრეზიდენტის ორი განკარგულება მთავრობას გადაეგზავნა. განკარგულებები 2016 წლის საპარლამენტო არჩევნებისა და აჭარის ავტონომიური რესპუბლიკის უმაღლესი საბჭოს არჩევნების დანიშვნის შესახებ პრემიერმინისტრს კონტრასიგნაციისთვის გადაეგზავნა.

„პრეზიდენტის განკარგულებების მიხედვით, მორიგი საპარლამენტო არჩევნები და აჭარის ავტონომიური რესპუბლიკის უმაღლესი საბჭოს არჩევნები 2016 წლის 8 ოქტომბერს გაიმართება.

საქართველოს პრეზიდენტმა პარლამენტის არჩევნები საქართველოს კონსტიტუციის 73-ე მუხლის მე-2 პუნქტისა და საქართველოს ორგანული კანონის „საქართველოს საარჩევნო კოდექსის“ 108-ე მუხლის მე-2 ნაწილის შესაბამისად დანიშნა, ხოლო აჭარის ავტონომიური რესპუბლიკის უმაღლესი საბჭოს არჩევნები „აჭარის ავტონომიური რესპუბლიკის სტატუსის შესახებ“ საქართველოს კონსტიტუციური კანონის მე-10 მუხლის მე-4 პუნქტის შესაბამისად.

საქართველოს პრეზიდენტის ორივე განკარგულება ძალაში 2016 წლის 8 აგვისტოდან შევა“, - აღნიშნულია პრეზიდენტის ვებგვერდზე გამოქვეყნებულ განცხადებაში.