სააკაშვილი საყვარელიძის თანამდებობიდან გათავისუფლების მიზეზებზე საუბრობს

ოდესის ოლქის გუბერნატორი, საქართველოს ყოფილი პრეზიდენტი, მიხეილ სააკაშვილი დავით საყვარელიძის უკრანის გენერალური პროკურორის მოადგილის თანამდებობიდან გათავისუფლებას ეხმაურება.

„მე ვიყავი იმის მოწმე, რომ როდესაც დავით საყვარელიძე დანიშნეს ოდესაში, პრეზიდენტმა მას მისცა მანდატი დამხმარებოდა მაფიასთან ბრძოლაში და წესრიგის დამყარებაში. მან აღძრა სისხლის სამართლის საქმეების მთელი სერიები კივალოვთან დაკავშირებულ მაქინაციებზე, ოდესის ოლქის ქალაქების მერებზე და ასევე პეტრო პოროშენკის ბლოკის ადგილობრივ წარმომადგენლებზე. დღეს მისი გათავისუფლების საფუძვლად დაასახელეს ოდესის მაფიის ხელმძღვანელის კივალოვისა და საერთაშორისო თაღლითის ბპპ-ს წარმომადგენლის გოლუბიევის წერილი. პრეცენდენტი, როდესაც პროკურორს ათავისუფლებენ ადგილობრივი, სეპარატიზმში შემჩნეული, ორგანიზებული კრიმინალური დაჯგუფების ოფიციალური მოთხოვნით ამას ქვეყნისთვის ძალიან მძიმე შედეგები ექნება. ეს ის შემთხვევაა, როდესაც პრეზიდენტმა, როგორც კონსტიტუციის გარანტმა საკუთარი პოზიცია უნდა გამოთქვას არაორაზროვნად, მკაფიოდ და მკაცრად. არა იმიტომ, რომ ეს იქნება რომელიმე ჩვენთაგანისთვის სასარგებლო, არამედ სახელმწიფოებრიობისთვის, მთლიანობისა და უკრაინის დიადი მომავლისთვის“, - აცხადებს სააკაშვილი.

შეგახსენებთ, რომ უკრანის გენერალურმა პროკურორმა შოკინმა დავით საყვარელიძე თანამდებობიდან გაათავისუფლა, მოგვიანებით კი შოკინის თანამდებობიდან გთავისუფლებას მხარი უკრაინის რადამ დაუჭირა.