საქართველო 2017 წელს "ადგილობრივი თვითმმართველობების შესახებ ევროპულ ქარტიას" შეუერთდება

საქართველო, თბილისი - 14:28 | 24.03.2016

ნანახია: 1618

კონგრესის 30-ე პლენარული სესია გაიმართა. საქართველოს რეგიონული განვითარების სამინისტროს ინფორმაციით, სხდომაზე განსახილველი ერთ-ერთი მთავარი საკითხი ის დოკუმენტი იყო, რომლის მიხედვითაც საქართველო 2017 წელს "ადგილობრივი თვითმმართველობების შესახებ ევროპულ ქარტიას" უნდა შეუერთდეს.

პლენარულ სესიაში რეგიონული განვითარებისა და ინფრასტრუქტურის მინისტრის მოადგილე თენგიზ შერგელაშვილი და თბილისის მერი დავით ნარმანია მონაწილობდნენ. თენგიზ შერგელაშვილმა, სიტყვით გამოსვლისას იმ რეფორმებზე ისაუბრა, რომლებიც ფისკალური დეცენტრელიზაციის კუთხით ბოლო სამი წლის განმავლობაში განხორციელდა.

საქართველოს წარმომადგენლებმა ყურადღება პოსტ-მონიტორინგის პროცესსა და რეგიონების დეცენტრალიზაციის მნიშვნელობაზეც გაამახვილეს. საუბარი შეეხო ადგილობრივი თვითმმართველობების რეფორმის შედეგად მიღწეულ პროგრესს.

ევროპის საბჭოს ადგილობრივი და რეგიონული ხელისუფლებების კონგრესის პრეზიდენტმა ჟან კლოდ ფრეკონმა განაცხადა, რომ კონგრესი იმუშავებს საქართველოსთან ერთად და დაეხმარება მას რეკომენდაციების შესრულებაში.