თარხან ბათირაშვილი კლინიკური სიკვდილის მდგომარეობაში იმყოფება

საქართველო, თბილისი - 11:03 | 14.03.2016

ნანახია: 1731

ომარ ალ შიშანი, იგივე თარხან ბათირაშვილი კლინიკური სიკვდილის მდგომარეობაში იმყოფება. ამის შესახებ ინფორმაციას სირიაში მოქმედი ადამიანის უფლებათა დაცვის ბრიტანული სადამკვირვებლო მისია ავრცელებს. ალ შიშანი ჩრდილოეთ სირიაში ამერიკის სამხედრო ავიაციის დაბომბვის შედეგად მძიმედ დაიჭრა.

როგორც ფრანს პრესი ორგანიზაციის ხელმძღვანელზე რამი რახმანზე დაყრდნობით ავრცელებს, ალ შიშანს დამოუკიდებლად სუნთქვა არ შეუძლია და ის ხელოვნური სუნთქვის აპარატზეა შეერთებული. მისივე თქმით, ცნობილი მეთაური ქალაქ რაქის საავადმყოფოში იმყოფება.

შეგახსენებთ, რომ 4 მარტს შეერთებულმა შტატებმა სირიის ტერიტორიაზე პანკისელი ომარ ალ შიშანის განადგურების მიზნით იერიშები განახორციელა.

ავიადარტყმები სირიის ჩრდილო-აღმოსავლეთით ქალაქ ელ-შადადის მიმდებარედ განხორციელდა. ელ-შადადი რაქისა და მოსულის დამაკავშირებელ გზაზე მდებარეობს.

ომარ ალ შიშანი ამერიკის მიერ ”ისლამური სახელწმიფოს” ძებნილ ლიდერთა სიაშია. მასზე ინფორმაციისათვის 5 მლნ დოლარის ოდენობის ჯილდოა დაწესებული.