ვილნიუსის სამიტზე გაცხადდა, რომ საქართველოს ნატოსთან ინტეგრაციის პროცესში პროგრესი არ არის და ეს სრულად ხელისუფლების პასუხისმგებლობაა - გიგი წერეთელი

ევროპული საქართველოს პოლიტსაბჭოს თავმჯდომარე, გიგი წერეთელი ეხმიანება ვილნიუსში გამართულ ნატოს სამიტს, სადაც ალიანსის წევრები უკრაინის გაწევრიანების გზიდან MAP-ის ამოღებაზე შეთანხმდნენ. 

მისი თქმით, ეს ისტორიული სამიტია არამხოლოდ უკრაინისთვის, არამედ თავად ნატოსთვის და ევროპის უსაფრთხოებისთვის, რადგან ძალიან მკაფიოდ გაცხადდა, რომ რუსეთი უნდა დამარცხდეს. 

გიგი წერეთელი ამბობს, რომ ამ სამიტმა კიდევ ერთხელ დაადასტურა, თუ სად არის საქართველო. მისი თქმით, ის ჩანაწერი, რაც არის კომუნიკეში, ეს ჩვენი მეგობრების კეთილი ნებაა, მაგრამ ასევე ძალიან მკაფიოა, რომ საქართველომ პროგრესი უნდა აჩვენოს. 

"რეფორმების კუთხით, ჩვენს ქვეყანაში არაფერი გაკეთებულა დაპირიქით, სიტუაცია უფრო დამძიმდა რუსეთთან თანამშრომლობით და უკრაინასთან ბრძოლით, ანტიდასავლური კამპანიით და ა.შ. ამიტომ ოპტიმიზმი, რომ ხელისუფლება სიტუაციის გაუმჯობესებას მოახერხებს, არ არის. საქართველოს ხელისუფლებამ არაფერი გააკეთა რომ დაახლოებოდა ნატოს და შესაბამისად რჩება ერთადერთი იმედი, რომ მხოლოდ ხელისუფლების შეცვლის შემდეგ შესაძლებელია ჩვენმა ქვეყანამ მიიღოს უსაფრთხოების გარანტიები და ნატოს წევრობა".- ამბობს გიგი წერეთელი.