უკრაინის ძალებს აქვთ საკმარისი რესურსი და იარაღი წინსვლის დასაწყებად - ვოლოდიმირ ზელენსკი

უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინის შეიარაღებულ ძალებს აქვთ საკმარისი რესურსი და შეიარაღება წინსვლის დასაწყებად. მისივე თქმით, უკრაინელი სამხედროები წარმატებისთვის თითქმის მზად არიან.

ამის შესახებ მან ბერლინში გერმანიის კანცლერ ოლაფ შოლცთან ერთობლივ პრესკონფერენციაზე განაცხადა.

ზელენსკის ჰკითხეს, აქვს თუ არა უკრაინის არმიას საკმარისი იარაღი და შეძლებს თუ არა უკრაინა წინსვლას.

უკრაინის პრეზიდენტს შეახსენეს მისივე სიტყვები, რომ „უკრაინას კონტრშეტევისთვის მეტი იარაღი სჭირდება“.

ზელენსკიმ მოკლედ უპასუხა, რომ მას სჭირდება კიდევ რამდენიმე ვიზიტი ევროპაში.

„კიდევ რამდენიმე ვიზიტი და მორჩა“, - თქვა უკრაინის პრეზიდენტმა და დაამატა, რომ უკრაინა ომში „თითქმის მზად არის წარმატებისთვის“, უკრაინელი დამცველები კი მოტივირებულები არიან და გრძნობენ მხარდაჭერას.