უკრაინის უსაფრთხოების სამსახურმა ჯარის სურსათის მომარაგების სქემასთან დაკავშირებით 2 პირი დააკავა

უკრაინის უსაფრთხოების სამსახურში აცხადებენ, გამოვლენილია მასშტაბური კორუფციული სქემა, რომლის ფარგლებში ჯარისკაცებისთვის განკუთვნილი სურსათის შესაძენად ბიუჯეტიდან გამოყოფილი 3 მილიონი დოლარის უკანონოდ მიტაცების ფაქტი გამოვლინდა.

გამოძიების ცნობით, თავდაცვის სამინისტროს ერთ-ერთი დეპარტამენტის თანამშრომლებმა გააფორმეს შეთანხმება ორი კომერციული სტრუქტურის ხელმძღვანელებთან, რომელიც სამხედრო მოსამსახურეების დისლოკაციის ადგილებში სურსათის მიწოდებას ითვალისწინებდა.

დაკავებულია კომერციული საწარმოს ორი ხელმძღვანელი, რომლებიც სამხედროებს დისლოკაციის ადგილზე სურსათ-სანოვაგის საბითუმო პარტიებს აწვდიდნენ.

"გამოძიების მონაცემებით, ეჭვმიტანილებმა უკრაინის შეიარაღებული ძალების კვებით უზრუნველყოფისთვის საქონლისა და მომსახურების მიწოდებისთვის უკრაინის თავდაცვის სამინისტროსგან გამოყოფილი თანხა მიიღეს, რომელიც გამოიყენეს არა დანიშნულებისამებრ, არამედ ჩრდილოვან, სახელმწიფოს მიერ არაკონტროლირებად ბრუნვაში ჩაუშვეს". – წერია უსაფრთხოების განცხადებაში.

ამასთან, კიევის ოლქში უსაფრთხოების სამსახურის თანამშრომლებმა დააკავეს ერთ-ერთი სამხედრო ნაწილის მეთაური, რომელმაც უკანონოდ მიიტაცა 2,4 მილიონი გრივნა, რომელიც ამავე ნაწილში დისლოცირებული სამხედროების კვებაზე უნდა დახარჯულიყო.